PN autoriza PR Horta dezloka ba Qatar-Azerbaijaun

DILI, 28 fevereiru 2023 (TATOLI)—Parlamentu Nasionál (PN), tersa ne’e, liuhosi reuniaun plenária autoriza fó asentimentu Prezidente Repúblika (PR), José Ramos Horta, hodi dezloka ba iha Qatar ho repúblika Azerbaijaun entre loron 3 no 14 marsu tinan 2023.

Notísia Relevante: PN La Autoriza Assentimentu Dezlokasaun PR Ba Roma

“Votu a-favór 43, kontra 0 no abstesaun 0, Parlamentu Nasionál aprova konsentimentu ba Prezidente Repúblika atu hala’o viajen hahú hosi loron 03 no 14 marsu 2023,” Prezidente Parlamentu Nasionál, Aniceto Longuinhos Guterres Lopes, hateten iha sala plenária PN.

Tuir karta pedidu  Xefe Estadu nian ajenda dahuluk ba Qatar hodi partisipa konferénsia ida sei ko’alia kona-ba List of Developing Countries (LDC)  ne’ebé inisia iha 05-08 marsu hala’o iha Doha, no ajenda  internasional daruak ba iha repúblika Azerbaijaun ho tema Global partnership forum inisia iha loron 09-12 marsu.

Deputada KHUNTO, Olinda Guterres, hateten hosi partidu KHUNTO vota a-favór ba pedidu ne’e tanba sentidu Estadu PR atu hala’o serbisu Estadu nian.

Maibé, nia parte krítika viajen PR nian la’o barak liu ba estranjeiru hodi gasta osan barak de’it, ne’ebé presiza sai ho ekipa  ki’ik iha ema na’in-haat labele barak, se ko’alia kona-ba poupansa óinsa.

Deputada PLP, Maria Angelina Sarmento, hateten pedidu asentimentu ba nasaun rua ne’e tuir viajen ne’e importante maibé fó hanoin atu PR labele repete tan presedente sira liuba, lala’ok viajen to’o tiha dalan klaran hetan konvite la’o fali tan ba nasaun seluk.

Nia mós preokupa iha reuniaun plenária ne’e deputadu hosi bankada CNRT la marka prezensa dala neen ona inklui ajenda atu fó asentimentu viajen PR nian.

Deputadu PLP, Noé da Silva, apresia Xefe Estadu nia programa ne’ebé kada fulan hala’o vizita ba estranjeiru hodi lori Timor-Leste ba mundu.

“Maibé gasta osan ka lae, ne’e poupansa ka lae, hanesan deputadu no sidadaun lamenta programa ida prioridade liu ba vizita no la tau prioridade ba situasaun nia nasaun rasik,” nia hateten.

Nia mós kestiona deputadu hosi CNRT sira la marka prezensa iha reuniaun plenária.

Deputadu PD, António da Conceição ‘Kalohan’, hateten PD seidauk kastigu Xefe Estadu bainhira hato’o pedidu mai PN atu ba estranjeiru, PD nafatin fó sentidu Estadu no apresia Prezidente Parlamentu Nasionál nian nafatin hala’o nune’e ohin ajenda ona dezlokasaun PR nian.

“No, kabe ba deputadu sira atu deside no PR la’ós ba ema hotu, nune’e ita nafatin pasa mensajen solidariedade instituisionál aseita PR nia dezlokasaun,” nia hateten.

Deputadu Fretilin, Antoninho Bianco, hateten Fretilin desde uluk nia prinsípiu Estadu demokrátiku no sentidu Estadu, tan ne’e Xefe Estadu ezerse direitu kontisuonál no PN iha dever atu fó konsentimentu tuir regra sira-ne’ebé iha nune’e tenke autoriza.

Jornalista : Nelson de Sousa

Editór      : Cancio Ximenes