iklan

NASIONÁL, EKONOMIA, HEADLINE

Tékniku husi empreza Free Balance atualiza hela Portál Transparénsia

Tékniku husi empreza Free Balance atualiza hela Portál Transparénsia

Portál Transparénsia.

DILI, 28 fevereiru 2023 (TATOLI)– Ministru Finansa (MF), Rui Augusto Gomes, informa ekipa tékniku hosi empreza Free Balance daudaun ne’e halo hela atualizasaun ba Portál Transparénsia hodi apár ho klasifikasaun orsamentu foun hamutuk 17, tanba antes ne’e iha de’it kategoria lima.

Item lima ne’e mak kapitál menór, kapitál dezenvolvimentu, sasán no servisu, transferénsia públika no saláriu no vensimentu. Ba klasifikasaun orsamentu foun hamutuk 17 ne’e mak, kustu funsionáriu, akizisaun bens korrente, akizisaun serbisu atuál, alugér, interrese, taxa, transferénsia korrente, despeza korrente seluk, akizisaun sasán no kapitál, transferénsia kapitál, finanseiru ativu no finanseiru pasivu.

“Portál ne’e ita depende ba Free Balance no Free Balance ne’e empreza ida iha ne’ebá, entaun sira mak kaer xave. Ita espera katak iha semana ida ka rua sira bele aserta, nune’e Portal Transparénsia bele ativu hikas”, Rui Gomes hatete iha Palásiu Governu.

Governante ne’e realsa ezekusaun la’o hela maibé portál ne’e rasik mak seidauk finaliza, ne’ebé daudaun tékniku sira sei atualiza no iha tempu badak sei funsiona normál.

Tuir dadus husi Ministériu Finansa, ezekusaun Orsamentu Jerál Estadu 2023, esklui kompromisu no obrigasaun sira to’o  24 fevereiru atinji ona millaun $87,6 husi totál orsamentu aprovadu biliaun $2,16.

Ezekusaun aas liu mak iha liña ministeriál ne’ebé ezekuta ona millaun $66,9 husi orsamentu alokadu biliaun $1,2. Tuir kedan husi ajénsia autónoma ho nia ezekusaun atinji ona millaun $15,2 husi orsamentu ne’ebé prevee ona milaun $218,3.

Autoridade Munisipál ezekuta ona millaun $3,4 husi totál orsamentu millaun $81,3 no RAEOA ezekuta ona besik millaun $1 husi osan millaun $84 no Fundu Dezenvolvimentu Kapitál Umanu ezekuta ona rihun $700 husi totál millaun $17,8.

Jornalista: Antónia Gusmão

Editora: Maria Auxiliadora

iklan
iklan

Leave a Reply

iklan
error: Content is protected !!