Xefe suku Fatulia: “Fita ne’e la signifika inaugura maibé símbolu deklarasaun ALFA”
BAUCAU, 28 fevereiru 2023 (TATOLI) – Xefe suku Fatulia, Angelino Moisés Perreira, haloos informasaun ne’ebé espalla iha rede sosiál Facebook katak la’ós serimónia inaugurasaun maibé atividade ne’e nuudar símbolu deklarasaun Área La Soe Fo’er Arbiru (ALFA) nível suku nian.
Nune’e, Autoridade suku Fatulia ne’e lamenta ho informasaun kona-bá inaugurasaun sintina espalla rede sosiál Facebook.
Xefe suku Fatulia, Angelino Moisés Perreira, klarifika, serimónia ne’e organiza hosi suku no la’ós inaugurasaun sintina maibé símbolu deklarasaun suku Fatulia tama ona ba kategoria ALFA ne’ebé parte Ministériu Saúde (MS) hamutuk ho parseiru dezenvolvimentu hanesan UNCEF no ETADEP lansa no implementa hosi Servisu Saúde Munisipál no autoridade suku.
“Ha’u nu’udar autoridade lamenta ho aktu ne’e, fita ne’e la’ós signifika inaugura sintina maibé símbolu katak komunidade iha suku Fatulia hotu-hotu iha ona sintina,” Xefe suku Fatulia informa ba Agência TATOLI liuhosi telefónika, tersa ne’e.
Nu’udar Komisaun organizadora ba serimónia refere ne’ebé responsável hosi autoridade suku lamenta tebes ho informasaun ne’ebé espalla iha rede sosiál Facebook no konsidera imoral no laiha koñesementu kona-ba programa ALFA.
Durante tinan barak komunidade iha suku Fatulia laiha sintina no soe fo’er boot arbiru de’it.
Nune’e liuhosi programa deklarasaun ALFA iha teritóriu nasionál ne’ebé hahú implementa iha tinan-2019 to’o tinan-2023 ne’e konsege hasa’e komunidade nia konsénsia iha Fatulia atu konstrui rasik sintina hodi utiliza ba prevensaun moras.
“Ha’u apresia hau-nia suku livre ona ALFA, maske sintina ladi’ak liu ba mós, pelumenus iha atu labele soe fo’er arbiru,” Angelino Perreira akresenta.
Munisípiu Baucau to’o agora hamutuk suku 11 mak deklara ona ALFA komposta hosi postu administrativu Venilale hamutuk haat hanesan; suku Fatulia, Bahamori, Baduho’o no Uailaha.
Postu Vemasse iha tolu hanesan; Ostico, Uaga’e no Caicua no postu Baguia iha suku haat hanesan; Afaloicai, Ossohuna, Defawasi no Uacala.
Komunidade hosi suku 11 refere prienxe ona kritéria sai ALFA tanba kada uma iha ona mínimu toilet ida ne’ebé konstrui rasik hosi komunidade hafoin partisipa kona-bá importánsia utililza toilet hodi prevene moras.
Prosesu deklarasaun ALFA liuhosi faze tolu hanesan hahú hosi suku sei kontinua ba postu administrativu no taka ho deklarasaun nível munisipál bainhira suku 59 iha Baucau laiha ona komunidade soe fo’er arbiru.
Notísia relevante: Saúde Baucau klarifika informasaun kona-bá serimónia ko’a fita iha Fatulia
Jornalista : Natalino Belo
Editór : Evaristo Soares Martins
