DILI, 01 marsu 2023 (TATOLI)—Vise Prezidente Parlamentu Nasionál, Maria Angelina Sarmento, hateten tuir rejimentu PN Deputadu ne’ebé abandona plenária to’o dala lima tutuir malu bele perde mandatu ka lakon mandatu.
Notísia Relevante: Bankada Governu preokupa Deputadu opozisaun auzénsia iha eleisaun komisáriu CAC
“Iha rejimentu iha artigu ida ko’alia kona-ba kuandu Deputadu ida nia la partisipa iha plenária dala lima konsekutivas loron tutuir malu, nia iha konsekuénsia ba Deputadu indivídu ou Depuatdu bankada tomak bele perde mandatu (lakon mandatu). Ba asuntu ida-ne’e ita-boot sira akompaña Deputadu sira barak mak lamenta ho asaun polítika CNRT nian,” Vise Prezidente Parlamentu Nasionál, Maria Angelina Sarmento, hateten ba jornalista sira iha PN, kuarta ne’e.
Tuir Rejimentu PN iha artigu artigu 7 (Lakon mandato) iha alínea 1 hateten, Deputadu sei lakon mandatu bainhira: a) Lahó justifikasaun, la hola asentu iha Parlamentu Nasionál to’o sesaun plenária ba dala lima ka la mossu dala lima tutuir malu ba sesaun plenáriu nian ka sesaun komisaun nian, no mós wainhira nia falta dala 15, maske la tuituir malu, lahó motivu justifikadu.
Ho asuntu ne’e meza plenária marka ona ajenda reuniaun líder bankada iha loron kinta (02 marsu 2023) sei ko’alia oinsá halo andamentu hodi tetu.
Kona-ba konsensu, hanoin esperénsia kandidatu agora atuál komisáriu CAC, Sérgio Hornai, uluk prezenta hosi CNRT nian, ida-ne’e CNRT la halo negosiasaun ho Fretilin no Fretilin hakarak fó kontinuidade ba instituisaun Estadu ida-ne’e ho nia serbisu.
“Ne’e Fretilin marka prezensa iha plenária atu prienxe korum tuir lei ne’ebé iha. Ne’ebé laiha lójika, agora CNRT dehan fali la ko’alia no la negósia ba malu ka laiha konsesu nível bankada,” nia dehan.
Hatán ba ida-ne’e, Xefe Bankada CNRT, Duarte Nunes, hateten Deputadu sira bankada CNRT la partispa iha reuniaun plenária ho razaun hodi protesta ajenda eleisaun komisáriu Komisaun Antí Korrupsaun (CAC, siglá portugés).
Tan ne’e, kandidatu ne’ebé mai hosi Governu presiza diskute didi’ak iha lídar bankada tanba presiza haree kandidatu ida labele haliis ba kor A ka B, ne’ebé presiza ema indepedente duni, ida-ne’e CNRT aseita ho kompromisu ba nasaun hodi kombate korupsaun.
“Aban iha reuniaun líder bankada ami sei ko’alia, tanbasá ami la simu kandidatu ne’e. Agora kestaun sira ameasa perde mandatu, ha’u ladún preokupa tanba iha rejimentu perde mandatu Deputadu só laiha justifikasaun. Maibé ami justifika no hato’o ona no haruka tan karta, tanba pozisaun polítika foti ne’e direitu opozisaun,” nia dehan.
Enkuantu meza Parlamentu Nasionál ajenda ona eleisaun ba komisáriu CAC dala-lima ona maibé kontinua adia tanba korum la prienxe, tanba presiza Deputadu prezente 49 no parte bankada opozisaun liu-liu Deputadu sira hosi bankada CNRT la partisipa.
Jornalista : Nelson de Sousa
Editór : Cancio Ximenes
