DILI, 01 marsu 2023 (TATOLI) – Governu aprova alterasaun dahuluk ba Dekretu-Lei n.u 6/2018, loron 14 fulan-marsu, ne’ebé fiksa valór subvensaun ka subsídiu ne’ebé Estadu atu fó ba kandidatu sira Prezidénsia Repúblika ba kampaña eleitorál sira.
Projetu dekretu-lei ne’e aprezenta hosi Primeiru-Ministru (PM), Taur Matan Ruak, iha Konsellu Ministru, kuarta ne’e.
“Alterasaun ida-ne’e ninia objetivu maka atu fó kompensasaun ba kandidatu sira Prezidénsia Repúblika nian bainhira presiza halo votasaun ba dala rua iha ámbitu Eleisaun Prezidensiál ne’e”, Ministru Prezidénsia Konsellu Ministru, Fidélis Magalhães, hatete iha Palásiu Governu.
Porta-voz Governu ne’e akresenta lei antes ne’e hatuur katak Estadu só fó subsídiu ba iha ronda dahuluk, maibé hafoin iha proposta sira Konsellu Ministru konkorda para iha alterasaun ida ne’e hatuur katak, labele iha repetisaun ba votu entaun ne’ebe mak hetan ona iha primeira volta no labele repete fali iha ronda daruak.
“Entaun iha ronda daruak ne’e nia valór tenke menus no labele 100% fali hosi númeru votante, signifika katak ho subvensaun ida ne’e halo kobertura de’it ba diferensa votu ne’ebé hetan iha primeira no segunda volta ba eleisaun Prezidente Repúblika”, nia esplika.
Governante ne’e realsa katak sé mak sei hetan ida ne’e mak kandidatu ba Prezidente Republika no iha kazu ida ne’e kandidatu iha ronda daruak maka atuál Prezidente Repúblika, José Ramos Horta, no eis-Xefe Estadu, Francisco Guterres ‘Lú Olo’.
Lembra katak iha eleisaun segunda volta ba Prezindénsia Repúblika ba períodu 2022-2027, Ramos Horta hetan votu 398.028 (62,1%) no Lú Olo 242. 239 ekivale ba (37,9 %), no iha primeira volta 46,58%, korrespondente ba eleitór 301.481 no 22,16% (143.408), respetivamente.
Valór osan ne’e tuir saida mak prevee ona iha Dekretu-Lei númeru 6/2018, 14 marsu kona-ba fixa valór subvensaun hosi Estadu ba kandidatu Prezidénsia Repúblika ba kampaña eleitorál, iha artigu 2 kona-ba ‘valór subvensaun’, iha pontu 1, kada kandidatu prezidensiál iha direitu atu simu subvensaun Estadu, ba kampaña eleitorál ho valór $4 ba kada votu ne’ebé hetan.
Jornalista: Antónia Gusmão
Editora: Maria Auxiliadora
