COVALIMA, 01 marsu 2023 (TATOLI)–Xefe Departamentu Jestaun Programa Edukasaun Covalima, Gregorio Ferreira Afonso, hateten implementasaun programa merenda eskolár iha Covalima sei hahú iha fulan-marsu tinan ne’e tanba orsamentu sei prosesu.
“Daudaun ne’e, Covalima seidauk implementa programa merenda eskolár ami haree kalendáriu janeiru to’o novembru ne’ebé hahú iha fulan-janeiru, maibé seidauk implementa tanba prosesu orsamentu. Entaun ami-nia planu, marsu semana rua tan ita bele implementa ona,” Gregorio Ferreira Afonso, hateten Agência Tatoli, iha nia kna’ar fatin, Santa Rosa, kuarta ne’e.
Maske iha loron 20 fulan-fevreiru tinan 2023 ne’e, ekipa jestaun programa (EJP) hamutuk ho administradór asina ona kontrau maibé hafoin asina presiza tan númeru senia balun ba EJP ida-idak atu foti osan.
“Agora daudaun ami prosesu hela kada koordenadór no tezoreira EJP, atu asina hodi submete sira-nia dokumentu sira hanesan kartaun eleitorál (KE), Billete Identidade (BI) no foto hodi entrega ba administradór no mós presiza tan administradór foto, Kartaun Eleitorál (KE ) no Billete Identidade (BI),” nia dehan.
Totál Eskola ne’ebé implementa programa merenda eskolár, hamutuk 128 ne’ebé implementa iha eskola privada no públiku ho nia benefisiáriu hamutuk 18,402.
Bazea kalendáriu implementa programa merenda eskolár ba tinan 2023 durante loron 164, maibé hakarak estudantu hotu iha Covalima atividade han ne’e redus ba loron 148.
Governu prevee orsamentu implementa programa merenda eskolár ba Covalima hamutuk $1.150.274 hosi orsamentu ne’e aloka ba programa merenda eskolár hamutuk $1.143.937,20.
Jornalista : Celestina Teles
Editór : Cancio Ximenes
