EKONOMIA, HEADLINE

Joven timor-oan 100 sei partisipa atividade JMJ iha Lisboa

Joven timor-oan 100 sei partisipa atividade JMJ iha Lisboa

Prezidente Ezekutivu Konsellu Nasionál Juventude Katólika Timor-Leste (KNJKTL), Pe. João Soares. Imajen Tatoli.

DILI, 01 marsu 2023 (TATOLI)— Prezidente Konsellu Nasional Juventude Katólika Timor-Leste (CNJCTL, sigla portugés), Pe. João Soares, hateten, joven timor-oan na’in 100 sei partisipa iha atividade Jornada Mundiál Juventude (JMJ) ka koñesidu ho lian inglés World Youth Day (WYD) iha Lisboa-Portugál.

Nia dehan, atu festeza atividade JMJ iha Lisboa ne’e la’os de’it ba joven Timor-Leste (TL) maibé ba Katólika sira hotu iha mundu  liuliu foin sa’e sira. Ida ne’e sai hanesan konvite direita ida hosi Amu Papa ba joven sira. Nune’e preparasaun TL nian mantein nafatin kontaktu ho Komisaun Nasional JMJ nian iha Portugál no hasoru malu hodi halo ona enkontru iha Portugál.

“Kona-ba Jornada Mundial Juventude, hosi Timor-Leste nian ita sei prepara joven 100 mak sei ba partisipa iha JMJ iha Lisboa,” Pe. João Soares dehan ba Agência Tatoli, kuarta ne’e.

Nia dehan, Timor-oan 100 ida ne’ebé sei aprtisipa JMJ iha Lisboa ne’e, balu hosi Timor-Leste mak ba no balu estudante sira ne’ebé hela iha Portugál no Lisboa. Maibé, importante mak tenke joven mak ba partisipa tanba atividade ne’e ba joven foin sa’e sira.

Hosi Timor-Leste, CNJCTL hahú halo rejistrasaun iha tinan kotuk to’o mai agora sei remata iha fulan marsu nian laran. Objetivu hatama sedu lista ba komisaun no atu prevene aumenta kustu billete viajen nian.

Pe. João dehan, kritéria rejistu mak dahuluk ba ema joven sira, idade hahú 18 to’o 25.  Kona-ba viajen joven sira nian ba Portugál ne’e nia responsabilidade balu mai hosi joven sira rasik no balu apoiu hosi igreja no Governu liuhosi Sekretáriu Estadu Juventude Desportu (SEJD).

Kona-ba montante orsamentu hosi Governu rasik verbalmente hatan ona maibé seidauk haruka ninia total orsamentu.

Eventu JMJ ne’e, dehan Pe. João  sei hahú iha loron 01-06 agostu 2023. Peregrina sira sai hosi Timor-Leste ba Portugál iha loron 21 jullu 2023.

Antes partisipa JMJ ne’e, Pe. João hateten, iha atividade balu mak peregrina sira tenke halo mak bolu Days in the Diocese 2023. Katak peregrina sira hosi mundu tomak iha Portugál prepara ona atividade ba sira  ba kada Dioseze sira iha Portugál no atividade ne’e hahú iha 25 to’o 30 jullu 2023.

Nune’e, remata iha loron 30 jullu ne’e,  joven sira hotu sei halo viajen filafali ba Lisboa. Tanba, JMJ ne’e hala’o iha Lisboa hahú iha loron 01 to’o 06 agostu 2023.

“Esperénsia ne’ebé joven sira sei aprende mak iha ne’ebá momentu di’ak atu hasoru direitamente ho Amu Papa, rona direitamente Amu Papa ninia liafuan no mensajen sira. Joven sira hosi mundu tomak sei hasoru malu, sei iha misa, adorasaun, animasaun, konfesaun no viasakra,” Pe. João hateten.

Nia dehan, atividade ne’e konvida joven sira hotu atu reflete misionáriu foin sa’e ninian ne’ebé sentraliza iha Jesus Kristu.

“Amu Papa hakarak joven sira ne’e valoriza sira-nia an nu’udar foin sa’e ida. Amu Papa mós hakarak iha JMJ ne’e atu joven sira iha ninia   sentidu perténsia ba uma kreda. Tanba perténsia ba uma kreda ne’e, hatudu iha lala’ok misionariu ninian,” nia hateten.

Pe. João dehan tan katak, atividade JMJ ne’e  ba joven katólika iha mundu maibé mós la taka dalan ba ema relijiaun seluk, tanba festa refere ne’e ba foin sa’e sira.

Pe. João  mos aumenta tan katakn, antes peregrina sira sai hosi Timor-Leste ba Portugál, iha fulan juñu sira ne’e, CNJCTL sei fó formasaun ba peregina sira. Formasaun ne’e mak hanesan retiru nune’e bele prepara sira oinsá iha ona terjetu ruma, tanba ba ne’e ho objetivu aprende filafali mai partilla. 

Jornalista : Arminda Fonseca

Editora     : Armandina Moniz

iklan
iklan

Leave a Reply

iklan
error: Content is protected !!