iklan

HEADLINE, SAÚDE

Marcelo Amaral: lei la fó dalan ba profisionál saúde servisu iha klínika privada

Marcelo Amaral: lei la fó dalan ba profisionál saúde servisu iha klínika privada

Diretor Jerál Serbisu Kooperativu, Ministériu Saúde, Marcelo Amaral. Imajen Tatoli/Francisco Sony.

DILI, 01 marsu 2023 (TATOLI) – Diretór Jerál Servisu Koorporativu iha Ministériu Saúde, Marcelo Amaral, dehan lei la fó dalan ba profisionál saúde sira ne’ebé hala’o servisu duplu.

“Tuir dekreitu lei númeru 86/2022 la fó dalan ba servisu profisionál saúde sira hala’o servisu iha Governu no halo tan servisu iha klínika privadu sira”, Marcelo Amaral, hateten bainhira konklui dizemina lei rejime espesiál ba profesionál saúde sira iha salaun Delta Nova, ohin.

Nia hateten, médiku sira ne’ebé mak halo prátika iha klínika privada sira presiza regula, tanba tuir dekretu lei bandu sira atu halo servisu iha fatin seluk hanesan klínika privadu sira.

“Bainhira sira la tuir lei, iha sasaun legál ba sira, maibé atu fó sansaun tuir adminsitrativu nian hanesan deside atu bele hasai nia kartaun prátika sira ne’ebé mak sira iha”, nia informa.

MS presiza dizemina lei rejime espesiál ba profisionál saúde, tanba iha alterasaun dahuluk ba dektreitu lei númeru 3/2012 kona-ba asuntu balun ne’ebé mak hamosu dezigualdade iha ninia renumerasaun ba tratamentu sira. Tanba ne’e mak presiza halo alterasaun dekretu lei númeru 86/2022 dezembru altera pontu balun, atu nune’e asegura didiak tratamentu ne’ebé iguál ba direitu profisionál saúde sira hotu iha teritóriu laran tomak.

Nia husu ba profisionál saúde sira iha sentru saúde hotu no ospitál sira, instituisaun públiku ne’ebé mak tutela iha MS, servisu sentrál atu bele diskute kona-ba dekretu lei ne’e, liuliu regulamentasaun no implementasaun ba dekretu lei ne’ebé mak agora daudauk altera ona.

“Dekretu lei ne’e la fo dalan ba sira, hahú iha tinan hira ba kotuk ho lei númeru 13/2012, maibé kontinua nafatin halao servisu dupla, entaun ita halo fali alterasaun ba lei númeru 86/2022, ita hahú iha 2022 bandu ona sira, maibé agora daudaun la’o nafatin, entaun ita presiza regulamenta, nafatin lei foun ne’e, karik la tuir mak sei fó sansaun”, nia esplika.

Iha fatin hanesan, Prezidente Komisaun Funsaun Públika, Faustino Cardoso, informa ohin eventu ida ne’e organiza husi MS atu lori profisionál saúde sira husi sentru saúde no ospitál sira mai partisipa iha ne’e atu hatene kona-ba lei ne’ebé atu regula sira nia servisu durante ne’e.

“Uluk iha lei 13/2012 mak regula sira nia servisu maibé ita implementa la másimu tanba kestaun dúvida la esklaresidu ka konflitu interese ne’ebé mak iha, entaun lei ne’e la implementa ho efisiente no efikas. Tanba ne’e mak ita lakohi repete esperiénsia hanesan, entaun eventu ida ne’e atu buka fó esplikasaun ho di’ak ba profisionál saúde sira atu servisu ne’e la’o ho di’ak liután”, Faustino Cardoso konklui.

Jornalista : Felicidade Ximenes

Editór : Zezito Silva

iklan
iklan

Leave a Reply

iklan
error: Content is protected !!