BAUCAU, 01 marsu 2023 (TATOLI) – Ofisiál supervizaun hamutuk na’in-181 pasa iha teste no hetan kontratu hosi Komisaun Nasionál Eleisaun (CNE, sigla portugés) munisípiu Baucau hodi hasoru eleisaun parlamentár tinan 2023.
Diretór CNE munisípiu Baucau, Esmeraldo Damião Belo, esplika, prosesu teste finaliza iha semana-kotuk ne’ebé kandidatu hamutuk na’in-267 mak selesionadu hodi tuir teste orál komposta hosi mane na’in-121 no feto na’in-146.
“Sufisiente ona atu ajuda ita hodi koloka ba sentru no estasaun votasaun bainhira eleisaun parlamentár fulan-maiu mai,” Diretór CNE munisípiu Baucau informa ba Agência TATOLIN iha Vila Nova, kuarta ne’e.
Hosi totál númeru ne’ebé pasa hamutuk 181 no na’in-ida rezervadu ne’ebé sei halao serbisu iha terrenu tuir postu administrativu idak-idak komposta hosi postu Baucau vila na’in-54, Baguia 30, Laga 25, Quelicai 35, Vemasse 14 no Venilale 23.
Ofisiál hirak-ne’e tuir planu sei tuir formasaun durante loron-tolu hanesan parte preparasaun hodi superviziona prosesu tomak kona-ba eleisaun hanesan kampaña partidu polítiku, pakotementu materiál sensitivu no transportasaun materiál ba sentru votasaun to’o akonpaña halo apuramentu nível munisipál.
“Hosi 180 ne’e ita prerapa tán na’in-rua sai rezervadu nune’e bainhira STAE aumenta sentru votasaun ita iha ona ema,” Esmeraldo Belo akresenta.
CNE Baucau rasik garante no sei esforsu hodi fó susesu ba prosesu tomak iha festa demokrasia eleisaun parlamentár tinan-2023 ne’ebé tuir kalendáriu sei realiza iha loron-21 fulan-maiu.
Jornalista : Natalino Belo
Editór : Evaristo Soares Martins
