BAUCAU, 02 marsu 2023 (TATOLI) – Autoridade administrasaun munisipál Baucau husu veteranu hotu atu kontinua iha espíritu luta hodi kontribui ba dezenvolimentu nasaun nune’e bele liberta povu.
Sekretáriu administrasaun munisipál Baucau, Simão dos Santo Marques Pinheiro, hato’o parabéns ba aman lutadór hotu ne’ebé aban, 03 marsu sei selebra loron nasionál veteranu ne’ebé importante hodi hanoin hikas eroi sira-nia luta ba libertasaun nasionál.
“Husu ba veteranu hotu kontinua espíritu eroi sira-ne’ebé mate ona nune’e hafanu ita hotu hodi bele kompleta no la’o hamutuk atu dezenvolve ita-nia rai, liuliu munisípiu Baucau nia dezenvolvimentu,” Sekretáriu administrasaun munisipál Baucau hateten iha Sentru Konvensaun Baucau (CCB, sigla portugés) Vila Antiga, kinta ne’e.
Simão Pinheiro, argumenta, selebrasaun loron nasionál veteranu sai fó inspirasaun ba jerasaun kontinuadór sira atu banati tuir espÍritu luta ne’ebé eroi sira husik hela nune’e motiva joven sira atu kontinua luta liberta povu hosi kiak no mukit.
Adjuntu Prezidente Autoridade Baucau konsidera veteranu nu’udar autor prinsipál no sai parseiru importante nune’e presiza kolabora hodi fó hanoin sai konseitu ida de’it iha dezenvolvimentu.
Istorikamente loron 03 marsu 1981 sai determinante ba luta libertasaun nasaionál bainhira tempu ne’ebá realiza konferénsia Maubai hodi hamosu estratéjia funu katak hotu-hotu submete ba orientasaun komandu luta hodi organiza funu hasoru okupasaun Indonézia to’o hetan independénsia.
Entretantu, munisípiu Baucau sei reprezenta veteranu na’in-20 hodi partisipa iha selebrasaun loron nasionál veteranu komposta hosi estrutura nível munisipál na’in-lima no na’in-15 seluk hosi postu administrativu neen iha munisípiu Baucau.
Jornalista : Natalino Belo
Editór : Evaristo Soares Martins
