OÉ-CUSSE 02 marsu 2023 (TATOLI) – Autoridade komunitáriu sira hosi suku Bobokase no Cunha, sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA) husu ekipa Programa Nasionál Dezenvolvimentu Suku (PNDS) atu finaliza projetu perfurasaun sistema bee-moos unidade rua ne’e konstrui iha suku nune’e komunidade bele uza ba nesesidade moris.
“Projetu PNDS tama iha suku Bobokase iha kedas 2021- 2022, maibé to’o agora seidauk finaliza, tanba mesin kee bee ne’e monta ona iha fatin, maibé husik tiha, iha tempu badak ha’u sei konvida ekipa PNDS suku no rejiaun nian atu halo enkontru evaluasaun, tanba saida mak projetu ne’e la’o tarde,” Xefe suku Bobokase, Sebastião Cob, hetete iha Oé-Cusse, kinta ne’e.
Tuir nia, projetu ne’e kleur ona to’o agora mós seidauk iha koordenasaun ho suku, kona- bá sira-nia difikuldade saida maka projetu la’o tarde.
“Iha semana ne’e ami sei konvida sira, atu hato’o klarifikasaun tanba ne’e konstrui iha suku Bobokase nia área, mákina monta tiha maibé atu dada bee ne’e maka lahatene tanba laiha ona kontinuasaun to’o agora, mákina mós husik de’it iha fatin,” nia afirma.
Xefe suku Cunha, Domingos Seko Kaunan, informa, iha 2022 PNDS konsege konstrui projetu gravitasaun unidade ida iha aldeia Noeninen, no daudaun ne’e komunidade uza ona, maibé servisu balu iha bee-matan sira finaliza.
“iha Noeninen nian ne’e, komunidade uza ona, maibé kanalizasaun presiza aumenta tanba distánsia iha bairru laran dook malu, depois servisu k’ik balu PNDS seidauk finaliza, liuliu iha konstrusaun bee-matan nian,” nia katak.
Hatán ba preokupasaun ne’e, diretór PNDS Oé-Cusse, Tomas Boquifai, informa, projetu bee-moos iha suku Bobokase, kestaun primeiru tanba iha fallansu hosi fornesedór, bomba ho nia kontrola panél, tanba projetu ne’e nia kontratu katak, sei pakote dala ida ho fabrikadu atu fornese, maibé to’o ikus fornesedór maka tarde iha mobilizasaun materiál.
“Tanba ita iha Oé-Cusse materiál sira-ne’e presiza hosi rai-li’ur, nune’e bele kompleta konstrusaun ne’e, ami koordena ona arubele aselera, maibé difikuldade ida mós tanba daudaun ne’e tempu udan, susar tebes atu asesu estrada to’o fatin ho di’ak,” nia katak.
Diretór PNDS ne’e la esplika detallu kona-bá gastu orsamentu ba projetu unidade rua ne’e, maibé nia parte promete sei koordena ho fornesedór sira atu kontinua obra ne’e ba faze finalizasaun nian.
Jornalista: Abílio Elo Nini
Editór: Evaristo Soares Martins
