Enjeñeiru SMOP Covalima identifika auto estrada nakfera
COVALIMA, 02 marsu 2023 (TATOLI)– Enjeñeiru Servisu Munisipál Obra Públika Covalima (SMOPC) halo ona observasaun no identifika kondisaun auto estrada iha parte suku Matai entre bairru Holbelis nakfera tanba impaktu hosi udan.
“Ami hatene, iha semana ida-nia laran, iha Covalima udan la para hodi fó impaktu ka afeta ba estrada nasionál no estrada rurál no auto estrada nakfera no rai taka. Entaun, iha loron segunda (27/02/2023), ha’u-nia enjeñeiru sira observa direta ona fatin hirak ne’ebé hetan estragu hanesan parte Sta 13+400 no Shoulder nakfera hotu,” Diretór SMOPC Alberto Cardoso relata ba agência tatoli ,iha nia servisu fatin santa rosa, kinta ne’e.
Hafoin enjeñeiru Servisu Munisipál Obra Públika halo observasaun kondisaun auto estrada diretór mós haruka kedas karta hodi submete ba dirasaun nasionál manutensaun kona-ba kondisaun auto estrada ne’ebé nakfera iha munisípiu Covalima.
“Ami enkamiña ona ba iha dirasaun manutensaun nian parte iha Matai entre Holbelis iha área Sta 13+400 ami observa ona no ami haruka ona dadus ba iha dirasaun nasionál ba manutensaun nian,” nia dehan.
Kona-ba kondisaun auto Estrada ne’e, servisu obra públika munisípiu nia kompeténsia relata de’it dadus ba nasionál mak atu halo atendimentu rápidu hahú bainhira ne’e depende desizaun hosi nasionál.
Ho nune’e, munisípiu labele halo intervensaun tanba laiha ekipamentu pezadu, nune’e hein de’it ekipamentu hosi Institutu Jestaun Ekipamentu, Institutu Públiku (IGE, I.P, sigla portugés) ne’ebé iha vise-Ministru Obra públika nia okos.
“Iha munisípiu laiha ekipamentu pezadu nune’e difisil tebes. Ita tane liman de’it ba IGE mai mós defisil, ne’ebé iha vise Ministru Obra Públiku nia okos, ami submete de’it dadus estrada hetan estragu sira-ne’e,” nia dehan.
Durante udan iha munisípiu Covalima, aleinde auto estrada hetan estragu, ponte Lomea mós agora daudaun kotu, hodi difikuldade movimentu transporte públiku no sidadaun sira atu ultra pasa ba-mai.
“Aleinde auto estrada hetan estragu , ponte lomea mós agora kotu hela, ita enkamiña hotu ona ba nasionál,” nia hateten.
Entretantu auto estrada iha Suai inaugura iha loron 17 novembru 2018 ne’ebé inaugura hosi eis Ministru Obrs Públika, Salvadór Eugenio Soares dos Reis Pires, ho Ministru Estadu Prezidénsia Konsellu Ministru, Agio Pereira
Auto estrada ne’ebé liga Fatucai ba Zumalai ho kilométru 30.3 ne’e gasta orsamentu millaun $304.
Jornalista : Celestina Teles
Editór : Cancio Ximenes
