Top

Governu aloka millaun $6 ba partidu polítiku asentu parlamentar kada tinan

Prezidente Komisaun Nasionál Eleisaun (CNE, sigla portugés), José Agostinho da Costa Belo. Imajen Tatoli/Francisco Sony

DILI, 02 fevereiru 2023 (TATOLI)–Prezidente Komisuan Nasionál Eleisaun (CNE-sigla protugés), José Agostinho da Costa Belo, hateten kada tinan Governu aloka millaun $6 ba partidu polítiku ne’ebé hetan asentu parlamentar.

Notísia Relevante: CNE apresia relatóriu subvensaun públika hosi partidu asentu parlamentár 

“Kada tinan aloka millaun $6 ba partidu sira asentu Parlamentu, maibé asentu iha ne’ebá ne’e la hanesan tanba iha ne’ebá boot liu mak kadeira 23 hosi Fretilin nian depois tuir mai mak CNRT ho kadeira 21, Partidu Libertasaun Populár (PLP) iha ualu (8) no Partidu Demokrátiku (PD) no Partidu Khunto iha lima (5) ho sira seluk. Entaun ita fahe tuir ida-ne’e maibé sira tenke aprezenta relatóriu ba gastu sira. Partidu asentu parlamentu kada kadeira sei hetan $92.000,” Prezidnte CNE ne’e hateten ba Agência Tatoli, iha nia kna’ar fatin, Colmera, kinta ne’e.

Prezidente CNE hateten, daudaun ne’e haree hela tinan 2022 nian tanba sira sumete ona relatóriu, CNE halo verifikasaun ho situasaun ne’e maibé CNE sei fó tan ona tempu ba sira atu halo justifikasaun kona-ba sira-nia gastu no resibu sira bainhira sira hola sasán ruma hanesan karreta ka buat seluk tan.

“Iregularidade iha no iha mós hato’o relatóriu ne’ebé mak la kompletu no iha asina akordu ba buat ruma hanesan hola sasán ho empreza ruma, maibé ninia realizasaun laiha. Depois iha kompras ne’e uza osan dolar ka rupiah no transferénsia halo oinsá, ida-ne’e tenke iha no halo hodi tau iha relatóriu,” nia dehan.

Partidu hotu-hotu kauze iha no bainhira iha irregularidade mak haruka prezidente partidu ka Sekretáriu Jerál partidu nian no tezoreiru tenke justifika bainhira submete relatóriu mai iha CNE.

Bainhira husu partidu ida-ne’ebé mak komete irregulariedade, Prezidente hatán, kada partidu nia kazu la hanesan tanba iha balun ne’ebé justifika no iha balun la justifika relatóriu, partidu balun laiha resibu, prosedimentu kontra erru ruma, hirak-ne’e hotu fó sai iha Jornál da Repúblika.

Maibé ida-ne’e CNE halo atendimentu hanesan, submete relatóriu laiha justifikasaun sei fó tempu maibé ida-ne’e CNE simu ona no verifika atu finaliza ona, bainhira finaliza mak CNE sei públika iha Jornal da Repúblika no sai konsume publika ona tanba orsamentu ne’e povu nian.

Prezidente dehan bainhira publika tiha mak parte kompetente mak bele hola medida ba asuntu refere, maibé bainhira denunsia ona Komisuan Antí Korupsaun (CAC) ho Ministériu Públiku bele halo ona nia servisu.

Bainhira públika ona sai efeitu ba ema hotu atu asesu, sé de’it bele asesu no militante mós bele asesu tanba osan ne’e mai atu organiza partidu, militante tuir mak partidu la hateten no la gastu, sira iha direitu atu halo keixa ruma, ne’e normál.

“Agora, iha 19 abríl, ita hahú halo kampañia eleitorál entaun iha marsu nia-laran tenke publika ona,” nia dehan.

Notísia Relevante: Partidu polítiku koopera di’ak ho CNE kona-ba subvensaun públika

Jornalista : Osória Marques

Editór       : Cancio Ximenes

Publisidade

Leave a Reply

Latest Post

error: Content is protected !!