Governu husu setór privadu Baucau prepra-aan sai membru OMK
BAUCAU, 02 marsu 2023 (TATOLI) – Minstériu Koordenadór Asuntu Ekonómika husu setór privadu iha munisípiu Baucau atu prepara-aan nune’e bele sai membru Organizasaun Mundiál Komérsiu (WTO, sigla inglés).
Diretór Ezekutivu Servisu Rejisto Verifikasaun Emprezariál (SERVE,IP), Florencio Sanches, nu’udar reprezentante MKAE esplika, setór iMportante rua mak presiZa halo preparasaun hanesan emprezáriu no kooperativa tanba durante ne’e Timor-Leste dependénsia boot ba merkadu internasionál.
“Husu atu sira prepara hodi tama iha merkadu internasionál, bainhira forte ona pelumenus ita minimiza produtu inportasaun,” Diretór Ezekutivu SERVE,I.P, hateten iha Sentru Konvensaun Baucau (CCB, sigla portugés) Vila Antiga, kinta ne’e.
Florencio Sanches argumenta, iha nasaun barak mak bainhira adere ba OMK kontribui forte ba setór ekonomia iha sira-nia rai-laran tanba benefísiu hosi membru OMK hanesan iha produtu hodi asesu ba merkadu no emprezáriu internasionál sira bele halo investimentu iha rai-laran.
Produtu Timor-Leste ne’ebé iha merkadu internasionál mak hanesan kafé, bee no kamí no besi aat, maske iha produtu hahaan lokal ne’ebé demanda internasionál boot maibé seidauk bele sufiseinte atu esporta ba rai-li’ur.
Maske nune’e, Governu kompromete kontinua apoia setór privadu liuhosi polítika nune’e bele finansia setór privadu hotu bele halo negósiu no prienxe rekizitu sai membru OMK iha ASEAN.
Prezidente CCI-TL munisípiu Baucau, José Januário dos Reis ‘Noki’, konsidera konsultasaun kona-ba membru OMK hodi adere ba ASEAN importante, maibé la’ós urjente tanba ne’e husu MKAE ho Ministériu Turismu, Komersiu no Industria (MTKI) presiza koordena atu mellora di’ak liután programa kréditu suave atu setór privadu hotu asesu no bele domina merkadu rai-laran antes sai membru OMK ba ASEAN.
“Kuandu produsaun no produtividade boot ona, merkadu Timor ita okupa hotu ona. adezaun ne’e urjénsia, maibé atuál ba hau la’ós urjensia,” Noki argumenta.
Entretantu membru WTO-ASEAN hamutuk nasaun sia komposta hosi Indonézia, Brunei Darusalam, Kambodia, Malázia, Myanmar, Filipina, Tailándia, Singapura no Vietnam.
Jornalista : Natalino Belo
Editór : Evaristo Soares Martins
