Mota Noél-Ekat hamate Teresa Suni iha RAEOA
OÉ-CUSSE 02 marsu 2023 (TATOLI) – Inan feto ida ho naran Teresa suni, hosi aldeia Tumin, suku Bobometo, sub-rejiaun Oésilo, kinta ne’e hetan dezastre naturál iha mota Noél-Ekat bainhira viajén hosi aldeia Tumin atu ba Oésilo.
Komisaun Jestaun Risku Dezastre Naturál (KJRDN) iha RAEOA fó-sai katak, dezastre akontese iha kinta ne’e, tuku 10:30 dadeersan, tanba udan-boot rezulta mota boot, nune’e hosi suku Bobometo atu koko ultrapasa mota Nóel-Ekat hodi hala’o viajen ba sub-rejiaun Oésilo sentru.
Maibé derrepente korrente mota boot iha tuku 10:30 dadeersan, maibé vítima konsege hetan kedas salva hosi komunidade sira iha mota Noél-Ekat maibé la konsege salva vida.
“Komunidade konsege salva nia vida hasai hosi mota laran iha tuku 11:00, hasai hosi mota laran ferik mate kedas iha fatin, maibé karreta ambulánsia postu saúde Oesilo nian mak ajuda tula hosi mota mai sentru saúde Oésilo atu halo tratamentu emerjénsia, no ekipa hosi sentru saúde ajuda bomba hodi hasai bee ne’ebé iha isin-lolon maibé lakonsege salva vida,” refere pájina ofisiál KJRDN Oé-Cusse ne’ebé Agência Tatoli asesu, kinta ne’e.
Liga ho akontesimentu ne’e, jornalista Tatoli tenta halo konfirmasaun kona-bá kronolojia ho xefe suku Bobometo, José Elo, maibé seidauk fó deklarasaun ruma tanba okupadu ho serbisu seluk.
Jornalista: Abílio Elo Nini
Editór: Evaristo Soares Martins
