iklan

HEADLINE, SAÚDE

MS atribui sertifikadu Covid-19 ba ema 22.883 ne’ebé viajen ba estranjeiru

MS atribui sertifikadu Covid-19 ba ema 22.883 ne’ebé viajen ba estranjeiru

Diretora Jerál Prestasaun Saúde Ministériu Saúde (MS), Odete da Silva Viegas. Imajen Tatoli/Francisco Sony

DILI, 02 marsu 2023 (TATOLI) Diretora Jerál Prestasaun Saúde iha Ministériu Saúde, Odete da Silva Viegas, informa durante ne’e MS distribui sertifikadu Covid-19 ba sidadaun sira ne’ebé mak durante ne’e viajen ba rai liur hamutuk 22.883.

“Ate agora pandemia Covid-19 sei nafatin iha tanba seidauk deklara katak kazu ne’e hotu ona, entaun bainhira ita-nia sidadaun sira viajen rai-liur presiza iha sertifikadu Covid-19, hahú iha 2021 to’o agora, daudaun ita distribui ona sertifikadu hamutuk 22.883”, Odete da Silva Viegas dehan iha Delta Nova, ohin.

Nia husu ba sidadaun sira nafatin hakbesik ba fasilidade saúde ne’ebé mak besik hodi simu vasina dahuluk, daruak no datoluk atu bele prevene husi moras letál.

“Ita la hatene kazu mosu tan variante foun mai, entaun problema mak ita mós proteje-an nafatin liuhosi uza maskara la’os obrigatóriu maibé ita konsiénte moras ne’e iha fatin ne’ebé ema barak”, nia hateten.

Nia afirma, sertifikadu vasinasaun ne’e bainhira viajen ba nasaun seluk nafatin husu ida ne’e, entaun enkoraja nafatin ba komunidade atu halo aprosimasaun ba sentru saúde sira atu vasina.

“Sertifikadu ida ne’e liuliu ba ema sira ne’ebé mak viajen ba rai-liur, maibé dalabarak ema iha rai-laran ladún preokupa tanba la viajen. Entaun atu hetan sertifikadu ne’e presiza hatama rekerimentu sira hanesan pasaporte no mós kartaun vasina Covid-19 atu bele hetan sertifikadu ho durasaun semana ida ka rua, maibé iha kazu urjénsia bele diretamente ba MS hodi esplika situasaun atu bele hetan lalais sertifikadu, tanba trata dokumentu ida ne’e gratuita”, nia konklui.

Jornalista : Felicidade Ximenes

Editór : Zezito Silva

 

iklan
iklan

Leave a Reply

iklan
error: Content is protected !!