Prezidente PN sei prezide serimónia loron nasionál veteranu 3 marsu

DILI, 02 marsu 2023 (TATOLI)—Prezidente Parlamentu Nasionál, Aniceto Longuinhos Guterres Lopes, sei reprezenta Prezidente Repúblika hodi prezide serimónia komemorasaun loron nasionál veteranu 03 marsu.

“Ohin, mai rona briefing hosi Prezidente Repúblika tanba iha serimónia aban Prezidente Parlamentu Nasionál mak sei reprezenta Prezidente Repúblika prezide serimónia loron nasionál veteranu,” Prezidente Parlamentu Nasionál, Aniceto Longuinhos Guterres Lopes, hateten ba jornalista sira hafoin ramata enkontru ho Xefe Estadu iha Palásiu Prezidensiál Nicolau Lobato, Bairru Pite, kinta ne’e.

Tanba, tuir ajenda Prezidente Repúblika, José Ramos Horta, sesta (03 marsu 2023) aban, sei dezloka ba Qatar, nune’e Prezidente Parlamentu sei hato’o diskursu Estadu iha loron importante ne’e.

Tuir ajenda ne’ebé iha Governu sei realiza komemorasaun loron nasionál veteranu ne’e iha Palásiu Governu.

Enkuantu, durante sorumutu lidér segundu órgaun soberania ne’e informa mós ba Xefe Estadu kona-ba funsionamentu PN nian.

“Ohin, ha’u mai informa ka partilla kona-ba funsionamentu Parlamentu Nasionál nian espesiál liu ba situasaun eleisaun komisáriu CAC ne’ebé seidauk realiza, no informa mós ba Prezidente Repúblika hodi akompaña óinsa buka solusaun prosesu ne’e bele la’o nafatin,” nia hateten.

Tuir Aniceto, kestaun ne’e interrese Estadu no presiza depende intendimentu bankada Parlamentár sira, nune’e órgaun Estadu sira trata tuir nia dalan to’o eleisaun votu mak determina.

Nia informa, ohin dadeer realiza reuniaun lidér bankada no hosi bankada CNRT mós tuir, nia-parte rona sira nune’e fó tempu semana rua tan ba bankda Parlamentár sira bele buka malu hodi ko‘alia ba asuntu ne’e.

“Durante semana rua sei laiha ajendamentu ba asuntu ne’e, liu tiha ne’e ha’u hein rezultadu ka  buat ruma kona-ba bankada sira-nia hanoin no entendimentu óinsá,” nia dehan.

Notísia Relevante:

Jornalista : Nelson de Sousa

Editór      : Cancio Ximenes