Servisu Edukasaun Dili hetan millaun $3,3 ba programa merenda eskolár
DILI, 02 marsu 2023 (TATOLI)–Diretór Servisu Edukasaun Munisípiu Dili (DSEMD), Carlito da Silva, hateten DSEMD hetan $3,393,169.56 ba programa merenda eskolár ba estudante 49.289 iha Dili ho nivel edukasaun Pre-Eskolár no ensinu báziku ba tinan 2023.
“Ita-nia programa merenda eskolár loloos hahú iha loron 01 marsu maibé tanba prosesu loke konta bankária ba grupu 17 ne’e mak atraza entaun programa merenda eskolár ne’e mós seidauk bele realiza. Ha’u fiar katak ita-nia grupu sira-ne’e mak hetan ona sira-nia konta bankária automatikamente bele transfere ona osan ba ida-idak nia konta atu bele hahú ona programa merenda eskolár ne’e,” nia hateten ba Agência Tatoli iha nia kna’ar fatin, Comoro, kinta ne’e.
Tanba orsamentu ne’ebé VIII Governu konstitusionál prevee ona ba programa merenda eskolár ba tinan ida-ne’e hetan ona promulgasaun no iha Munisípiu Dili rasik ninia orsamentu ba merenda eskolár hamutuk $3,393,166.56 ne’ebé sei implementa ba totál estudante hamutuk 49.289.
Tuir nia, hosi total estudante 49.289 ne’ebé sei asesu ba programa merenda eskolár ne’e hosi nivél ensinu báziku hamutuk 45.291 ne’ebé kompostu hosi ensinu báziku públiku 38.478-feto na’in 20.015 no mane na’in 18.463, enkuantu hosi ensinu báziku privadu nian iha estudante hamutuk 6.813 kompostu hosi feto na’in 3.683 no mane 3.130.
Hosi nivél edukasaun Pre-Eskolár nian totál estudante ne’ebé sei asesu ba programa merenda eskolár hamutuk 3.998 ne’ebé mai hosi Pre-Eskolár Públiku hamutuk 1974 kompostu hosi feto 999 no mane 948, enkuantu hosi Pre-Eskolár privadu nian totál estudante hamutuk 2024 kompostu hosi feto 1.002 no mane 1.022.
Hosi totál orsamentu ne’ebé prevee ona ba programa merenda eskolár ba tinan ida-ne’e, implementa de’it ba fulan 10 hahú hosi marsu to’o dezembru, maibé ba fulan janeiru no fevereiru la tama iha lista tanba ba tinan ida-ne’e rasik orsamentu merenda eskolár ba kada estudante sa’e ona ba 42 sentavu.
“Orsamentu ne’ebé ita simu ba tinan ida-ne’e konta de’it ba fulan 10 hahú hosi marsu to’o dezembru ne’ebé hosi janeiru no fevereiru nian ko’a tiha katak ne’e la konta ona,” nia dehan.
Prezidente Autoridade Munisípiu Dili, Gulhermina Filomena Saldanha Ribeiro, hateten prosesu loke konta bankária ba grupu 17 ne’ebé atu fornese merenda eskolár ba estudante 49.289 iha Munisípiu Dili atraza tebes.
Nia rasik manda ona karta ba Banku Nasionál Komérsiu Timor-Leste (BNCTL) atu husu ekipa hosi banku rasik bele mai prosesa de’it konta bankária iha edifísiu munisípiu Dili maibé pedidu ne’e hetan ona resposta katak limitasaun ba funsionáriu Banku nian tanba ne’e sira labele kumpre pedidu ne’e.
Maibé fiar katak ba implementasaun programa merenda eskolár iha Dili no iha territóriu nasionál ne’e sei la’o hotu iha fulan ida-ne’e, no agora daudaun prosesu ne’ebé sei la’o hela mak oinsá grupu implementadór sira-ne’e bele hetan ona sira-nia konta bankária atu osan ne’ebé prevee ona bele transfere ba sira-nia konta bankária.
Jornalista : Tomé Amado
Editór : Cancio Ximenes
