Xefe floresta Covalima husu sidadaun kuidadu flora no fauna
COVALIMA, 02 marsu 2023 ( TATOLI)–Xefe Departamentu Reprezentasaun Territoriál Floresta Planta Indústria Covalima, Francisco Sarmento, husu ba sidadaun sira kuidadu flora no fauna tanba se la kuidade fó impaktu ba umanu.
Notísia Relevante: SEA husu públiku tenke kuidadu rikusoin flora no fauna iha Timor-Leste
“Ita hanesan timoroan tenke kuidadu flora noo fauna ho di’ak. Bainhira ita la kuidadu ho di’ak impaktu fila mai ita, hanesan ema umanu. Se di’akliu tenke kuidadu didi’ak flora ho fauna ita utiliza ho di’ak no bele iha funsaun di’ak,” Francisco Sarmento hateten ba Agência Tatoli, iha nia kna’ar fatin, Kampung Baru, kinta ne’e.
Ho nune’e, guarda floresta kontrola flora ho fauna, liuhosi halo patroliamentu no hala’o sensibilizasaun ba komunidade, nune’e kominidade bele kompreende oinsá bele kuidadu flora ho fauna.
“Kontrola flora ho fauna baibain ami bolu rekursu florestál liu-liu ba flora fauna ni’an, ekipa floresta halo patrullamentu ba iha área floresta no hala’o sosializasaun ba ita-nia komunidade sira bele kompreende,” nia dehan.
Rekursu umanu atu kontrola flora ho fauna sufisiénte tanba foin halo rekrutamentu, maske la kobre iha suku maibé bele halo patrollamentu iha munisípiu bele kobre.
“Durante halo patrollamentu ami hasoru problema mak hanesan ita-nia komunidade koa ai illegal, dala ruma komunidade seidauk kompreende lei floresta entaun oinsá ami bele esplika ba sira nune’e bele kompreende,” nia hateten.
Funsionáriu guarda floresta planta Indústria no tékniku durante halo patrullamentu iha munisípiu Covalima hamutuk na’in-39.
Jornalista : Celestina Teles
Editór : Cancio Ximenes
