DILI, 03 marsu 2023 (TATOLI)—Prezidente Konsellu Kombatente Libertasaun Nasionál (CCLN, sigla portugés), Vidal de Jesus “Riak Leman”, husu líder nasionál (Maun Boot) sira atu hamutuk lori dezenvolvimentu ba futuru ne’ebé di’ak ba nasaun no povu ida-ne’e.
Notisia Relevanye: Veteranu sai ezemplár ba jerasaun foun sira moris banati
“Ha’u husu ba Maun Boot sira hamutuk ba, fiar malu ba no rona malu ba hanesan iha ai-laran hodi halo dezenvolvimentu ba ita-nia rain. Maibé, ita hetan independénsia no liberta pátria, Maun Boot sira xoke malu maibé ha’u atu dehan ida-ne’e polítika ne’ebé alin joven sira lalika meta no tuir. Tanba ha’u fiar loron ruma sira sei hamutuk,” Riak Leman hateten hafoin komemora loron nasionál veteranu ba dala-VI (03 marsu 2017-03 marsu 2023) ha Sentru Konvensaun Dili (CCD), sesta ne’e.
Riak Leman hateten, tanba de’it situasaun polítika mak dezde 2016 mai to’o agora lííder rezisténsia fahe malu.
“Tanba ne’e ohin loron ikus tinan ne’e nian ba loron veteranu, ha’u husu Maun boot sira atu hasoru malu ba no buat ida partidu ne’e tau ketak, maibé ita hamutuk durante iha funu naruk maibé importante hodi ita liberta rai ida-ne’e,” nia hateten.
Prezidente Parlamentu Nasionál, Aniceto Lonhiinhos Guterres Lori, lori Parlamentu Nasionál nia nara hato’o votu parabéns ba veteranu Timor-Leste ne’e komemora loron nasionál veteranu 03 marsu.
“Ha’u lori Parlamentu Nasionál nia naran hato’o votu parabéns ba ita hotu, veteranu no povu tomak ita servisu hamutuk, ita hotu-hotu unidu atu hametin lori prosesu dezenvolvimentu iha ita-nia rain ne’e,” nia dehan.
Presidente Parlamentu Nasionál ne’e hateten, presiza lori bem estar povu tomak nian ba futuru rai ida-ne’e nian.
“Ba kontinuasaun momentu ne’ebé ita-nia eroi no eroina sira-ne’ebé hahú tiha ona, ita hotu-hotu sei iha kna’ar ne’ebé luta ba, atu hametin dezenvolvementu, atu lori bem estar povu tomak nian, hanesan objetivu ikus liu ba funu hahú ba libertasaun pátria mak to’o ohin loron,” nia hateten.
Jornalista : Osória Marques
Editór : Cancio Ximenes
