iklan

MUNISÍPIU, VIQUEQUE

Komunidade hetan Francisco nia mate-isin iha Lafaek nia kabun laran

Komunidade hetan Francisco nia mate-isin iha Lafaek nia kabun laran

Komunidade hetan Francisco Mendes nia isin-mate iha Lafaek nia kabun laran, sábadu (04/03). Imajen/Espesiál.

VIQUEQUE, 04 marsu 2023 (TATOLI)—Peskadór Francisco Mendes ho idade 32 hosi aldeia Bahauain, suku Uma Uain Leten, postu Viqueque villa, munisípiu Viqueque, ne’ebé lakon iha sesta (03/03) ne’e, to’o ikus komunidade hetan duni nia mate-isin iha lafaek nia kabun laran tanba lafaek mak tata no tolan.

Notísia Relevante: Peskadór ida hala’o peska iha Bee Ahin Viqueque lakon

“Ohin lorokraik maizumenus tuku 17h00, komunidade soe rede ba Bee Ahin Lugasa laran, komunidade konsege kaer tiha lafaek ida. Nune’e ita-nia komunidade  oho tiha Lafaek no ko’a lafaek nia kabun mak hetan vitima nia ulun no isin sira fahe ba rohan-rohan. Matebian nia isin parte ulun, liman no ain, lafaek tata kotu hodi lekar iha Lafaek nia kabun laran,” Xefe suku Uma Uain Leten, postu administrativu Viqueque Villa, Martinho Soares Gusmão, hateten ba Agência Tatoli liuhosi telefonika, sábadu ne’e.

Autoridade ne’e hatutan, matebian Francisco Mendes nia mate-isin família sira agora daudaun hatuur ona iha matebian ninia rezidénsia iha aldeia Bahauain hodi halo prosesu funebre.

“Mate-isin ita komunidade no família lori ona mai iha ninia rezidensia hodi halo prosesu funebre tuir kultura Timor nian,” nia dehan.

Matebian Francisco Memdes hanesan ema peskadór, horisehik (sesta, 03/03) lorokraik ba soe rede ikan nian iha Bee Ahin Lugasa, depois kalan família sira telefone ba ninia nomór la simu, nune’e iha dadeer (sábadu ohin ne’e) família sira tun ba Bee Ahin haree matebian nia roupa no rede mak namlele hela iha bee lihun leten.

Nune’e hahú hosi dadeer komunidade no ekipa hosi Autoridade Protesaun Sivil (APC) sira buka to’o meudia la hetan mate-isin.

Iha lorokraik, komunidade iha inisiativa soe rede ba bee lihun Bee Ahin Lugasa laran mak kaer Lafaek ida no komunidade deside oho tiha lafaek refere mak foin hetan mate-isin iha lafaek nian kabun laran.

Matebian Francisco Mendes kaben na’in, husik hela nia feen no oan na’in-tolu ne’ebé kompostu hosi feto ida (1) no mane na’in-rua (2).

Jornalista : Vitorino Lopes da Costa

Editór        : Cancio Ximenes

iklan
iklan

Leave a Reply

iklan
error: Content is protected !!