DILI, 04 marsu 2023 (TATOLI)—Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno, hala’o enkontru bilaterál ho omólogu, Ministra Negósius Estranjeiru Nova Zelándia, Hon Nanaia Mahuta iha Singapura hodi ko’alia kona-ba relasaun bilateral atu hametin kooperasaun iha áreaturimu, ambiente, seguransa no alterasaun kllimátika.
“Ami na’in-rua hasoru malu ko’alia foka liu kona-ba importánsia atu hametin área kooperasaun bilaterál hirak ne’ebé iha ona no buka atu habelár liután kooperasaun iha área potensiál sira seluk, hanesan turizmu, peska, seguransa no ambiente, liu-liu kona-ba kestaun alterasaun klimátika,” Ministra Adaljiza Magno hateten ba Agência TATOLI, sá badu ne’e.
Relasiona ho kooperasaun multilaterál, nia dehan, iha nesesidade atu apoia Timor-Leste nia adezaun nu’udar membru plenu ba Asosiasaun Sudeste Aziátiku (ASEAN, siglá-inglés) no Organizasaun Mundiál Komérsiu nian (OMK).
Aleinde ne’e, sira mós troka hanoin kona-ba nesesidade atu envolve ativamente iha Estadu Illa ki’ik sira kona-ba alterasaun klimátika, rekuperasaun ekonómika pós-COVID-19 no diversifikasaun ekonómika.
Hafoin ne’e, parte rua asina mós Deklarasaun kona-ba Parséria entre Timor-Leste ho Nova Zelándia.
Ho deklarasaun ida-ne’e, nasaun rua sei estabelese prinsipiu hirak ne’ebé parte rua partilla, prioridade no entendimentu sira ne’ebé sei orienta kooperasaun no envolvimentu iha área prinsipal lima maka hanesan kooperasaun multilaterál no rejionál, dezenvolvimentu sustentavel inkluzivu, komérsiu no kooperasaun ekonómika, hametin relasaun entre ema-ba-ema no relasaun entre governu ho benefísiu mútuo.
Iha eventu ne ‘e, Ministra Magno akompaña husi Embaixadora Timor-Leste nian ba Singapura, Natalia Carrascalão, Diretór-Jerál ba Asuntu Bilaterál, Crisogno de Araújo, no Xefe Gabinete, Natalia Sarmento.
Jornalista : Hortencio Sanchez
Editór : Cancio Ximenes
