EDUKASAUN, HEADLINE, MUNISÍPIU, OÉ-CUSSE (RAEOA)

AATL sensibiliza kritéria bolsa estudu hosi Austrália ba entidade Oé-Cusse

AATL sensibiliza kritéria bolsa estudu hosi Austrália ba entidade Oé-Cusse

Embaxada Austrália sensiliza kritéria asesu bolsa estudu ba Austrália iha Oé-Cusse. Imajen Tatoli/ Abílio Elo Nini.

OÉ-CUSSE 06 marsu 2023 (TATOLI) – Australian Awards Timor-Leste (AATL), segunda ne’e sensibiliza kritéria atu asesu bolsa estudu Austrália ba entidade sira iha Rejiaun Administrativa Espesiál Oé-Cusse Ambeno (RAEOA).

Reprezentante AATL, Ana Varela, agradese ba Autoridade RAEOA tanba bele autoriza ekipa AATL hodi realiza sensibilizaun atu fahe informasaun ba autoridade komunitária sira inklui kargu xefia sira iha Oé-Cusse, bele iha koñesimentu oinsa asesu bolsa estudu ba Austrália.

Nune’e nia espera ho sesaun ne’e, bele hatutan informasaun ba iha komunidade sira, liuliu iha nível suku no aldeia ba joven ne’ebé remata ona sira-nia estudu iha nível sekundáriu bele mós enkoraja no hodi aplika iha bolsa estudu ne’e rasik.

“Bolsu estudu ba Austrália eziste iha Timor-Leste, dezde tinan 2000 to’o ohin loron, iha ona estudante 357 mak asesu no kompleta ona sira-nia estudu, maibé númeru ne’e mai hosi Oé-Cusse kiik tebes, razaun ida-ne’e maka ekipa AATL mai halo sensibilizasaun, espera katak iha futuru mai númeru hosi Oé-Cusse bele aumenta sa’e,” Ana Varela, ko’alia iha salaun administrasaun Numbei Oé-Cusse.

Iha biban ne’e, Sekretáriu Rejionál ba Asuntu Administrasaun, Martinho Abani Elo, reprezenta Autoridade hato’o agradese ba AATL tanba ne’e oportunidade di’ak, primeira-véz mai halo sensibilizasaun iha Oé-Cusse.

“Programa realiza kada tinan maibé ami iha RAEOA dalaruma menus informasaun, tán ne’e maka afeta númeru ki’ik tebes, ami agradese tanba tinan ne’e mai fahe informasaun nune’e futuru bele informa ba joven sira atu konkorre, importante maka ohin ne’e xefe suku no jestór sira profesór bele hatene kona-bá kritéria prosedimentu lala’ok oinsá, tanba eskola sekundáriu iha oé-Cusse, sub-rejiaun sira eziste hotu,” nia agradese.

Entretantu, prosesu inskrisaun ba bolsa estudu ne’e hahú loke ona iha loron 01 marsu sei termina iha 01 maiu 2023 ho kritéria tenke sidadaun Timorense, bele aplika bolsa estudu iha nível baxarelatu (D3), lisensiatura (S1), mestradu (S2) no doutoramentu (S3).

Nune’e bolsa estudu ne’e envolve sidadaun hotu tantu ema ho defisiénsia, bele asesu iha kursu sira hanesan, agrikultura, edukasaun, saúde, komunikasaun no seluk tan.

Jornalista   : Abílio Elo Nini
Editór           : Evaristo Soares Martins

iklan
iklan

Leave a Reply

iklan
error: Content is protected !!