iklan

EKONOMIA, HEADLINE, MUNISÍPIU, OÉ-CUSSE (RAEOA)

Diversifika ekonomia azúl hodi proteje rekursu naturál iha tasi

Diversifika ekonomia azúl hodi proteje rekursu naturál iha tasi

Autoridade RAEOA no UNDP realiza semináriu ida ba kargu xefia, ONG, autoridade komunitáriu sira oinsá dezenvolve poténsia rekursu tasi nian. Imajen Tatoli/ Abílio Elo Nini.

OÉ-CUSSE 06 marsu 2023 (TATOLI) – Ajénsia internasionál United Nations Development Programe (UNDP), serbisu hamutuk ho Sekretáriu Rejionál ba Asuntu Komérsiu no Indústria, realiza semináriu kona-bá diversifikasaun ekonómia azúl iha Rejiaun Administrativa Espesiál Oé-Cusse Ambeno.

Prezidente Autoridade RAEOA, Arsénio Paixão Bano, konsidera, kooperasaun UNDP ho Autoridade importante, atu tau matan ba rekursu naturál sira iha tasi nune’e iha futuru bele dezenvolve di’ak liután setór peska iha Oé-Cusse.

“Ohin, ita hahú diskute kestaun foun ba Oé-Cusse, ekonomia azúl komesa haree oinsá maximiza espasu tasi nian, aumenta rendimentu iha Oé-Cusse, ohin Timor-Leste komesa ko’alia barak kona-bá ekonomia azúl, esperiénsia barak introdús hosi UNDP la’os esplora de’it tasi maibé oinsa proteje ita-nia rekursu naturál sira iha tasi, tán ne’e ha’u husu mangrove sira iha área tasi liu-liu Oébau labele estraga beibeik,” Arsénio Bano, ko’alia iha ámbitu semináriu diversifikasaun ekonomia azúl iha Otel Ambeno, segunda ne’e.

Tuir nia, rekursu saida de’it iha tasi, liuliu iha bee-laran, presiza proteje hosi ema hotu, tanba esplorasaun iha tasi sei kontribui ba setór ekonomia sai di’ak ba komunidade.

Kuandu iha rai, daudaun ne’e Autoridade selebra ona apoia ho grupu komunidade sira, hanesan grupu ba programa Oé-Cusse Busines Inkubatór (OBI), no programa seluk tán bele kontribui.

“Entaun iha duni posibilidade itabele esplora iha-ne’e, ne’e mós iha ligasaun ho program hosi Wordfish Timor-Leste nian, ha’u esperu ho semináriu ohin ita bele aprende barak liután, tanba RAEOA serbisu hamutuk ho UNDP kada tinan, ida-ne’e tama komponente ida ho serbisu kooperasaun ho Autoridade kona-bá ekonomia azúl,” nia katak.

Ezekutivu ne’e informa, Autoridade mós simu audénsia hosi WorldFish Timor-Leste, ko’alia kona-bá área peska nian atu investe liuhosi ikan adapt iha Oé-Cusse poténsia ba sub-rejiaun Nítibe no Pante Makasar.

Responsável programa ekonomia azúl hosi UNDP iha Timor-Leste, Ijha Faturahman, informa, objetivu hosi semináriu ne’e atu identifika rekursu no fó orientasaun ba kresimentu ekonómiku inovativu no sustentável iha ekonomia azúl.

Nune’e mós liuhosi biban ne’e halibur vizaun no misaun mai hosi emprezáriu foinsa’e sira atu kontribui ba diversifikasaun ekonomia azúl iha Timor-Leste, liuliu iha Oé-Cusse espesífiku liu kona-bá rekursu naturál sira iha tasi laran tau matan no labele estraga beibeik.

“Ohin, iha realiza semináriu ida ba kargu xefia, ONG, Autoridade komunitáriu sira oinsá dezenvolve poténsia rekursu tasi nian, nune’e bele hasa’e konsiensializasaun komunidade oinsá kontribui tau matan ba ita-nia rikusoin tasi nian, entaun liuhosi oportunidade bele deskuti oinsá dudu dezenvolvimentu ekonomia ho susesu iha Timor-Leste, espesialmente iha Oé-Cusse, nune’e iha futuru ita bele hasa’e liután produsaun tasi nian iha Oé-Cusse,” nia ko’alia iha otél Ambeno Oé-Cusse.

Jornalista: Abílio Elo Nini
Editór: Evaristo Soares Martins

iklan
iklan

Leave a Reply

iklan
error: Content is protected !!