iklan

HEADLINE, SAÚDE

Funsionáriu HNGV halo kobransa ilegál iha ona prosesu investigasaun

Funsionáriu HNGV halo kobransa ilegál iha ona prosesu investigasaun

Diretór Klínika Hospitál Nasionál Guido Valadares (HNGV), Marcelino Correia, imajen TATOLI/ Felicidade Ximenes.

DILI, 06 marsu 2023 (TATOLI) – Diretór Klíniku Hospitál Nasionál Guido Valadares (HNGV), Marcelino Correia, hateten funsionáriu ospitalár ne’ebé mak halo kobransa ilegál iha ona prosesu investigasaun.

“Ami rekoñese katak pesoál ne’e funsionáriu HNGV ne’ebé durante ne’e hala’o servisu iha medikál chek up nian, hodi halo atendimentu ba sira ne’ebé mak atu hetan atestadu médiku ba servisu iha estranjeiru maibé pesoál ne’e halo kobransa. Kazu ne’e iha ona prosesu investigasaun nian”, Marcelino Correia, dehan ba jornalista sira iha nia kna’ar fatin HNGV, ohin.

Nia haktuir, video ne’ebé mak virál iha media sosiál, ospitál hapara provizóriu nia servisu, atu prosesa tuir lei ne’ebé iha.

“Iha momentu ne’ebe virál kedas, ne’e ami hapara ona pesoál saúde husi servisu atendimentu medikál chek up ho provizóriu no hein ba prosesu tuir lei ne’ebé mak vigora iha Timor- Leste, tanba ne’e HNGV entrega prosesu tomak ba Minsitériu Justisa”, nia esplika.

HNGV halo ona audit internál ba parte relevante liuliu medikál cek up hodi haree ba akontesimentu ida ne’e, hafoin submete dadus ba MS hodi foti desizaun.

Iha sorin seluk, Diretora Jerál Prestasaun Saúde, Odete da Silva Viegas, dehan pesoál saúde ne’ebé mak halo kobransa iha HNGV, iha ona prosesu investigasaun.

“Bainhira ema ruma viola lei saúde presiza halo investigasaun maibé ida ne’e HNGV rasik halo ona depois hato’o ba Ministra Saúde hodi hatun orientasaun ba inspetór saúde hodi halo asaun ruma ba ida ne’e”, nia konklui.

Jornalista : Felicidade Ximenes

Editór : Zezito Silva

iklan
iklan

Leave a Reply

iklan
error: Content is protected !!