DILI, 06 marsu 2023 (TATOLI)—Parlamentu Nasionál (PN) husu Governu atu halo intervensaun lalais ba ponte Nunura no Loes tanba iha tempu udan bele fó ameasa ba movimentu populasaun nian.
“Ha’u foti kestaun ida kona-ba ponte Nunura, ponte Loes no ponte Marobo. Espesialmente ba ponte Nunura, iha sábadu bainhira ha’u halo kontaktu eleitorál ba rai Maliana, ha’u tun rasik hosi karreta haree fatin ne’e favór boot ida Governu tau matan. Tanba, bee nia volume estraga tiha ona halo degradasaun rai no halo natar lubun lakon ona iha ne’eba,” Deputadu KHUNTO, António Verdiál, levanta kestaun ne’e liuhosi reuniaun plenária PN, segunda ne’e.
Razaun nia husu Governu nia intervensaun ho lalais tanba ho nune’e de’it mak bele salvaguarda povu sira-nia natar no ponte.
“Segundu haree volume bee iha Loes asuntu ne’e foti tinan rua kotuk, maibé to’o ohin loron Governu la tau matan óinsa ajuda fahe ne’e atu bele nune’e labele haforsa bee mai de’it parte Loes nian orsida halo ponte ne’e bele monu,” nia dehan.
Aleinde ne’e, nia dehan, iha Marobo nian mós presiza tebes Governu tau matan tanba ponte tolu ne’e importante tebes ba munisípiu Bobonaro.
Prezidente Parlamentu Nasionál, Aniceto Longuinhos Guterres, mós hateten ponte Nunura ho Loes ameasadu ne’e tinan ida ka rua tiha ona maibé to’o ohin loron seidauk normaliza.
“Udan kuandu kontinua la para hanesan ne’e bele estraga hotu. La’ós ponte rua ne’e de’it maibé ba fatin seluk mós hanoin presiza intervensaun Governu nian atu halo prevensaun,” nia hateten.
Deputadu Pertidu Demokrátiku (PD), António da Conceição ‘Kalohan’, sekunda kona-ba problema mota maibé nia hakarak foti kestaun daudaun tempu udan afeta ba moris komunidade nian, nune’e ezije serbisu protesaun sivíl atu serbisu másimu liután hodi fó protesaun ba povu, hanesan iha Lolotoe mota lalin labarik ida, aliénde iha Viqueque Lafaek tata ema no situasaun seluk tan.
Ni, husu Ministru ba Asuntu Parlamentár no Komunikasaun Sosiál (MAPKOMS) atu ko’alia ho protesaun sivíl fó alerta ba komunidade situasaun atmosfera iha territóriu hodi komunidade tau atensaun.
Deputada Fretilin, Lídia Norberta, dehan tempu udan iha fatin barak dalan sai preokupasaun ba povu tanba ne’e sekunda ho preokupasaun ne’ebé maluk Deputadu sira foti no husu Governu bele intensifika liuhosi ekipa Institutu Jestaun Ekipamentu ninia prezensa liután ba manutesaun dalan ka fatin sira-ne’ebé risku.
Ministru Asuntu Parlamentár no Komunikasaun Sosiál (MAPKOMS), Francisco Jerónimo, informa saida mak Deputadu sira kestiona no foti relasiona ho ponte no estrada sei haruka kedas ba ministru tutela hodi fó atensaun.
Jornalista : Nelson de Sousa
Editór : Cancio Ximenes
