DILI, 06 marsu 2023 (TATOLI) – Sekretáriu Estadu Ambiente (SEA), Demétrio do Amaral, informa SEA sei atribui, iha semana ne’e, lisensa ambientál ba empreza konstrutora projetu estratéjiku sira.
“Atualiza serbisu ne’ebé SEA halo ba Primeiru-Ministru, liuliu projetu sira iha Timor-Leste ne’ebé iha relasaun ho atividade ambientál nian, prosesu emisaun lisensa ba projetu sira no bele dehan projetu estratéjiku lubuk ida ne’ebé Timor-Leste tenke hahú hala’o”, Demétrio do Amaral dehan hafoin hasoru malu ho Xefe Ezekutivu, iha Palásiu Governu, segunda ne’e.
Projetu sira ne’e mak hanesan projetu drenajen iha Dili laran, estrada ligasaun Gleno [Ermera] bá Aitutu [Ainaro], projetu Aeroportu Internasionál Prezidente Nicolau Lobato Comoro, projetu Marina Square ne’ebé halo ona lansamentu dahuluk iha tinan 2022 no renova lisensa ambientál ba projetu Pelican Paradise.
Nia esplika, projetu dreinajen Dili ninia orsamentu mai hosi Orsamentu Jerál Estadu no hosi parseiru sira hamutuk kuaze millaun $700, tanba ne’e iha semana ne’e sei atribui ba proponente mak Bee Timor-Leste (BTL no ba empreza estrada Gleno-Aitutu.
“Estrada ne’e importante tanba atu halo rota haleu foho Ramelau bá to’o Aitutu. Ida ne’e importante loos atu korre izolamentu populasaun-sira iha zona sentrál nian. Projetu ne’e rasik ninia lisenseamentu ambientál to’o ona preparasaun dokumentu avaliasaun ba impaktu ambientál no planu jestaun ambientál”, dehan.
Kona-bá lisenseamentu ambientál ba projetu Aeroportu Internasionál Comoro iha ona faze termu referénsia, hanesan mós ho projetu Marina Square no tempu badak bele konklui.
“Projetu Pelican Paradise ne’e ninia lisensa ambientál SEA emite dezde 2019, maibé mate ka inválidi tiha ona no agora iha faze renovasaun, tanba renova de’it entaun lalori tempu barak no espera tempu badak emite renovasaun para depois empreza sira bele hahú sira-nia investimentu iha ita rain”, nia konklui.
Jornalista: Antónia Gusmão
Editora: Maria Auxiliadora
