iklan

NASIONÁL, EDUKASAUN, DILI, HEADLINE

SKA haat tenke kuidadu ekipamentu eletrónika ne’ebé parseiru sira apoiu

SKA haat tenke kuidadu ekipamentu eletrónika ne’ebé parseiru sira apoiu

Enkaregadu Negósiu Embaixada EUA iha Timor-Leste, Tom Daley (parte lo’os) Hamutuk Reprezentante UNICEF iha Timor-Leste, Bilal Aurang Zeb Durrani (parte karuk) entrega simbólikamente Ekipamento eletronikos Ministru Edukasaun Juventude no Desportu, Armindo Maia (parte klaran), iha salaun MEJD, Vila Verde, segunda (06/03). Imajen Tatoli/Egas Cristóvão

DILI, 06 marsu 2023 (TATOLI) – Ministru Edukasaun Juventude no Desportu (MEJD) Armindo Maia husu ba dirijente sira atu jere ho didi’ak no responsabilidade ekipamentu eletrónika ne’ebé parseiru dezenvolvimentu sira apoiu ona ba sentru komunitária aprendizajen (SKA) haat ne’e atu nune’e bele ajuda estudante sira iha prosesu ensinu aprendizajen nia laran.

“Ba profesór no estudante sira iha sentru aprendizajen haat ne’ebé sai benefisiáriu ba projetu ne’e ha’u husu ba ita boot sira atu bele uza sasán sira ne’e ho responsabilidade tomak tanba apoiu sira ne’ebé maka ita nia kolega amigu sira entaun ita boot sira tenke uza ho didi’ak,” Armindo Maia husu ba dirijente sira ne’ebé partisipa iha serimónia entrega ekipamentu eletrónika hosi UNICEF ba MEJD iha salaun enkontru MEJD Vila Verde segunda ne’e

Nia haktuir katak ekipamentu eletrónika sira ne’ebé fornese daudaun ona hosi parseiru dezenvolvimentu UNICEF no Embaixada Estadu Unidus Amerika iha Timor-Leste ne’e ho intensaun atu tulun estudante sira ne’ebé maka tuir formasaun iha sentru ne’e.

Tanba intensaun di’ak ne’ebé parseiru sira fó ba SKA haat hanesan Dili (Kristu Rei ho Mora Vida Maskal) Manatutu (Futuru Rentau) no Baucau (Baucau Kreativu) hakarak tulun sentru sira ne’e bele fó formasaun ida di’ak liu tan ba foin sa’e sira. ne’e duni ho ekipamentu laptop haat (4) no tableta 42 konsidera sei fó benefísiu ba ema barak liu tan ne’ebé maka tuir formasaun iha sentru sira ne’e.

Governante ne’e reforsa liu tan ninia esplikasaun ba dirijente SKA haat ne’e katak kuandu ekipamentu sira ne’e maka uza ho didi’ak kuidadu no responsabilidade ba tinan rua nia laran bele konvida konfiansa liu tan hosi parseiru sira atu loke nafatin sira nia vontade hodi kontinua ajuda nafatin sentru sira ne’e.

Tuir nia katak sentru haat ne’e maka hatudu responsabilidade boot hodi uza fasilidade sira ne’e ho di’ak sei loke mós oportunidade ba parseiru sira atu kontinua apoiu liu tan sentru sira ne’e no loke mós dalan hosi tulun liu tan sentru sira seluk.

“Ha’u hakarak dehan sasán sira ne’e ita nia parseiru sira fó liu tiha tinan rua hanesan ne’e maka sira ba haree fali sei kontinua uza no fó benefísiu duni ba estudante sira bele loke sira nia laran hodi kontinua fó liu tan apoiu ba ita boot sira,”  nia tenik.

Jornalista: Tomé Amado

Editór       : Rafael Ximenes de A. Belo

iklan
iklan

Leave a Reply

iklan
error: Content is protected !!