VIQUEQUE, 07 marsu 2023 (TATOLI)— Konfrontu entre grupu juventude ka komunidade iha suku Bahalara-Uain, postu administrativu Viqueque-Villa, munisípiu Viqueque, tersa (07/03) ne’e, iha tuku 11:00, rezulta uma komunidade hitu mak hetan sunu no Polísia Nasionál Timor Leste (PNTL) Viqueque, konsege detein suspeitu na’in-40.
“Konfrontru entre joven sira iha suku Bahalara-Uain ne’e rezulta uma komunidade hamutuk hitu mak hetan sunu. No ami konsege detein ona suspeitu na’in-40, kompostu husi feto 7 no mane 33. Daudaun ami detein suspeitu hirak ne’e iha sela Eskudra PNTL, Postu Viqueque-villa hodi halo identifikasaun ba suspeitu sira”, Komadante Polísia Nasionál Nasionál Timor Leste (PNTL) munisípiu Viqueque, Superitendente, Sebestião Alves Quintão, ba Agência Tatoli, tersa ne’e.
Konfrontu ne’e, nia informa entre grupu joven ka komunidade iha aldeia Adarai no Aldeia Kameli Tur. Uma komunidade iha aldeia Kameli tur hamutuk hitu mak hetan sunu hanesan uma hela fatin tolu, dapur tolu no kioske ida maka ahi-han.
PNTL munisípiu Viqueque hahú halo ona identifikasaun ba autór konfrontu na’in-40 hosi aldeia rua refere.
“Daudaun ne’e, prosesu ba kazu ne’e iha hela identifikasaun nian laran, ne’ebé akontesimentu ninia kauza saida ha’u seidauk hatene, bainhira proseu identifikasaun hotu maka ita foin hatene motivu husi akontesementu mak saida”, Komadante ne’e afirma.
Maske seidauk simu relatóriu, maibé Superintendente ne’e afirma problema hanesan uluk akontese ona, maibé la rezulta buat ruma, daudaun ne’e mosu derepente akontese fali no komunidade uma kain hitu mak sai vítima.
“Akontesimentu ne’e, ha’u duvida oituan tanba ha’u iha fatin la akontese buat ruma, sira hafu ha’u sai husi ona Viqueque ne’e akontese ona problema. Agora ha’u mai tiha Dili aban atu enkontru iha ne’ebá akontese konfrontu”, nia lamenta
Daudaun ne’e, nia dehan situasaun iha suku Bahalara-Uain la’o kontroladu no PNTL munisípiu Viqueque sei kontinua akompaña situasaun.
Jornalista : Vitorino Lopes da Costa
Editór : Florencio Miranda Ximenes
