iklan

NASIONÁL, EDUKASAUN, DILI, HEADLINE

MEJD simu ona dadus profesór reklamante besik 1.000

MEJD simu ona dadus profesór reklamante besik 1.000

Diretór Jerál Administrasaun no Finansa hosi MEJD, Antoninho Pires. Imajen Tatoli/Egas Cristóvão

DILI, 06 marsu 2023 (TATOLI) – Ministériu Edukasaun Juventude no Desportu (MEJD) simu ona lista profesór reklamante hosi Munisípiu hitu besik 1.000 ne’ebé maka la pasa iha selesaun dokumentu.

Diretór Jerál Administrasaun no Jestaun Finansa (DJAJF) Ministériu Edukasaun Juventude no Desportu Antoninho Pires relata katak, lista profesór voluntáriu ne’ebé hahú tama ona iha Ministériu Edukasaun ne’e kuaze besik 1.000 bele konsidera seidauk tama hotu tanba foin maka Munisípiu hitu sei hela Munisípiu neen (6) mak seidauk haruka mai kuandu tama hotu ona maka foin halo analiza dala ida molok foti desizaun.

“to’o ohin dadeer ha’u foin haree iha Munisípiu hitu mak tama ona maibé ha’u la lembra munisipiu hitu ninia naran maibé bele dehan profesór reklamante besik 1.000 ne’e kuaze 800 ida hanesan ne’e,” Antoninho Pires ba jornalista sira iha edifísiu MEJD Vila Verde segunda ne’e.

Nia dehan ba profesór reklamante sira ne’ebé maka la hato’o sira nia reklamasaun Ministériu Edukasaun sei laiha responsabilidade ida ba sira nia problema tanba agora daudaun sira nia estatutu ne’e nu’udar profesór voluntáriu hela. Ne’ebé sé sira la halo reklamasaun Ministériu Edukasaun mós laiha buat ida ho sira.

Tanba Profesór voluntáriu sira ne’ebé agora daudaun hanaran an profesór reklamante ne’e tanba sira la pasa iha selesaun dokumentu atu hakat ba profesór kontratadu. tanba ne’e sira iha diretu atu hatama sira nia reklamasaun ba Diresaun Servisu Edukasaun Munisipál ida-idak durante loron 15, hahú hosi loron 14-28.

Portantu loron 15 ne’e kuandu remata ona no tuir orientasaun ne’ebé hasai hosi Ministériu edukasaun katak reklamante sira tenke hato’o sira nia reklamasaun liu hosi edukasaun Munisipál sira depois maka edukasaun Munisipál sira sei kompila hodi submete mai Ministériu edukasaun sentrál atu halo analiza hodi foti desizaun.

“kuandu loron 15 hotu ona kerdizér loron ba reklamasaun mós hotu ona. ita hein katak edukasaun Munisipál sira bele halo kompilasaun ba reklamasaun sira ne’e depois hato’o mai Ministériu hodi halo analiza,” nia dehan.

Jornalista: Tomé Amado

Editór       : Rafael Ximenes de A. Belo

iklan
iklan

Leave a Reply

iklan
error: Content is protected !!