VIQUEQUE, 07 marsu 2023 (TATOLI)— Ministériu Asuntu Kombatente Libertasaun Nasionál (MAKLN) liuhosi Konsellu Veteranu Munisípiu Viqueque hahú loke vaga ba veteranu no martir sira nia-oan atu asesu bá bolsa estudu iha rai laran no rai li’ur.
“Ha’u hakarak apela ba veteranu no martir sira nia-oan ne’ebé agora iha prosesu estudu karik, mai rejista tanba bolsa estudu loke ona iha Konsellu Veteranu Viqueque. Bolsa estudu ida-ne’e importante tanba Governu fó ona ne’e ita tenke aproveita rejista atu asesu hodi hasa’e koñesementu no abilidade liuhosi edukasaun”, Sekretáriu Ezekutivu KVMV, Daniel Sarmento Soares “Fogeti”, hateten ba jornalista sira, iha iha sede Konsellu Veteranu munisípiu Viqueque, tersa ne’e.
Veteranu ne’e hatutan, bolsa estudu ba veteranu no martir sira-nia oan ba munisípiu Viqueque bolsa hamutuk na’in-165, husi bolsa ida-ne’e bele hakma’an inan-aman sira nia-terus.
“Bolsa ida-ne’e ami fahe hotu ona brosura ba postu administrativu lima iha Viqueque atu mai konkorre vaga ne’e,” nia afirma.
Ekipa avaliasaun sei haree valór husi tinan 2022 no 2023 nian ida ne’ebé maka valór di’ak liu bele asesu tanba programa bolsa estudu ne’e la haree ba grau veteranu sira nian.
“Hahú horiseik, ami halo rejista ona universitáriu sira na’in-15 maka halo ona rejistarasaun no ami sei haree sira nia-dokumentu tuir kritériu bolsa nian”, katak.
Tuir kalendáriu hahú prosesu rejistu bolsa estudu kombatente sira-nia oan ba tinan letivu 2023, rejistrasaun hahú 27 fevereiru 2023 no sei ramata loron 28 marsu 2023.
Kritériun dokkumentu ne’ebe kandidatu sira tenke aprezenta maka hanesan, formulariu rekerimentu bolsa estudu, kartaun eleitorál husi kandidatu (fotokópia ida), Billete Identidade husi kandidatu (fotokópia), Sertidaun RDTL ka Baptizmu husi kandidatu (orijinál), dokumentu ne’ebé komprova kandidatu matríkula ekolár ba tinan letivu 2023 (orijinál), dokumentu ne’ebé komprova aproveitamentu eskolar husi kandidatu iha tinan letivu 2022, ho rezultadu eskolar ida-idak no média finál kaderneta eskolar (fotokópia) no konta banku husi kandidatu (fotokópia).
Enkuantu, bolsa estudu ba veteranu no martir sira-nia oan kompostu husi nivél bolsa estudu husi nivel estudu primeiru síklu ensinu báziku presiza na’in-10 no bolsa estudu Segundo síklu ensinu báziku (BEEB2+3) presiza na’in-30. Nune’e mós Bolsa estudu rua no tolu siklu ensinu sekundáriu presiza ema na’in-50. Bolsa estudu ensinu superiór universitáriu iha Timor-Leste presiza na’in-70 no bolsa estudu superiór universitáriu iha rai li’ur presiza na’in-lima.
Jornalista : Vitorino Lopes da Costa
Editór : Florencio Miranda Ximenes
