COVALIMA, 07 marsu 2023 (TATOLI)–Jerente Kompañia Internasionál Timor Resources, Filomeno Andrade, hateten progresu perfurasaun mina rai-maran posu Lafaek ne’ebé lokaliza iha suku Labari, postu administrativu Suai, munisípiu Covalima hatudu iha sinál pozitivu.
Notísia Relevante: Aviaun VH-PUY hosi Austália hatun ekipamentu perfurasaun posu Lafaek iha Covalima
“Durante halo perfurasaun mina rai-maran posu Lafaek hatudu sinál di’ak no pozitivu hosi levantamentu bazea ba dadus estudu hosi jeolojia fó. Molok halo perfurasaun, dadus hanesan ho Estudu ne’ebé iha. Ami haree iha prespetiva no iha rezultadu ba mina matan ni’an kona-ba iha valór ekonomia ka lae. Ida-ne’e mak sei halo teste ba mina matan hodi haree kapasidade mina, kuantidade-hira ho gas hira, ida-ne’e mak determina valór komersiál,” Filomeno Andrade hateten progresu ne’e ba Agência Tatoli iha Aero Portu Comandante-Em Chefe Das Falintil, Kay Rala Xanana Gusmão, iha Covalima, tersa ne’e.
Progresu perfurasaun mina rai-maran povu Lafaek hetan rezultadu di’ak no kompañia entuziasmu atu kontinua atividade hodi halo teste ba mina matan hodi kompleta perfurasaun .
“Rezultadu oras-ne’e daudaun hatudu ami hetan di’ak tebes no kompañia entuziasmu atu kontinua hala’o atividade teste ba mina matan hodi kompleta atividade perfurasaun,” nia dehan.
Tanba, tuir nia, molok atu hala’o teste presiza ekipamentu balun atu hala’o perfurasaun no hodi halo reste mina matan, atu haree kapasidade bazea ba dadus ne’ebé iha bainhira hala’o perfurasuan hatudu sinál pozitivu.
”Progresu perfurasaun agora ami to’o ona metru 3100 atu finaliza ona, no hahú atu hala’o teste ba mina hodi haree kapasidade posu mina hira mak iha ho gas, ida-ne’e agora hala’o hela preparative,” nia hateten.
Tuir alvu ne’e kompañia Timor Resources fura to’o metro 3000 maibé bazea ba rekomendasaun hisi jeolojia to’o metru 3500, oras ne’e to’o metru 3100 no ida-ne’e depende bainhira karik hatun tan perfurasaun, ho nune’e ekipamentu balun ohin to’o hodi halo perfurasaun
Jornalista : Celestina Teles
Editór : Cancio Ximenes
