Brigadista na’in-150 hosi STAE Baucau hahú halo serbisu iha baze
BAUCAU, 08 marsu 2023 (TATOLI) – Brigadista hamutuk na’in-150 hosi Sekretariadu Tékniku Administrasaun Eleitorál (STAE) Munisipál Baucau hahú hala’o serbisu iha baze hodi rekolla informasaun kona-ba sentru votasaun.
Diretór Servisu Munisipál STAE Baucau, Natividade Freitas Guterres, esplika, prosesu rekrutamentu rezulta brigadista hamutuk na’in-150 mak koloka tuir tótal sentru votasaun ne’ebé mak kontratu finaliza ona no kontinua hahú tún ba kada suku hodi prepara kondisaun hodi hasoru eleisaun parlamentár iha fulan-maiu.
“Hotu-hotu asina ona kontratu no komesa simu orientasaun no tún ba baze hodi identifika sentru votasaun tuir kondisaun geografia iha terrenu,” Diretór Servisu Munisipál STAE hateten iha Vila Nova, kuarta ne’e.
Serbisu inportante brigadista sira durante semana-ida iha terrenu mak hanesan koordenasaun ho autoridade lokál, identifika fatin hodi estabelese sentru votasaun, levantamentu dadus kona-bá kondisaun estrada hodi prepara karreta tuir estrada.
Alende ne’e, liña eletrisidade, liña internete no ekipamentu seluk hanesan fiu hodi instala eletrisidade ba sentru votasaun no fahe informasaun hodi halo rekrutamentu ba poling staf sira.
“Diretór ho ofisiál edukasaun vontante sei tuir lai formasaun iha Dili mak kontinua hatutan ba brigadista sira nune’e sira kontinua hanorin fali poling staf,” Natividade Guterres akresenta.
STAE Baucau konsidera ho prezensa brigadista sira ajuda ona serbisu preparativu sira kona-bá eleisaun parlamentár ne’ebé Prezidente Repúblika dekreta ona sei akontese iha loron-21 fulan-maiu tinan-ne’e.
Totál eleitór tinan-2022 iha munisípiu Baucau nian hamutuk 96,704, iha aumentu 1.925 ne’ebé mai hosi eleitór foun idade 17 iha munisípiu Baucau.
Jornalista : Natalino Belo
Editór : Evaristo Soares Martins
