Emprezaria Clarissa Lay kria alfaeate apoiu ba feto sira
DILI, 07 marsu 2023 (TATOLI)—Empreza Alfaeate ida hodi promove talentu no koñesimentu, kria empregu atu ajuda feto sira-nia finansiamente hadi’ak sira-nia kualidade moris, responde ba nesesidade família no kria auto-empregu.
“Ha’u iha traballadór feto na’in-50 iha munisípiu Dili. Suku farda uniforme hamutuk rihun sia ba funsionáriu Governu sira. Entaun hosi ne’e ita haree feto sira iha kapasidade intelektuál no fíziku atu dezeña, tesi no suku roupa,” nia dehan ba Agência Tatoli, hafoin partisipa loron Internasionál Feto ho tema “Knovasun ba futuru ne’ebe mak iguál ba jeneru”, iha Otél Timor, tersa ne’e.
Emprezária ne’e hateten katak kompañia suku ona farda ba funsionáriu Estadu no instituisaun privadu sira, sujere atu labele suku farda sira iha estranjeiru.
Clarissa Lay garante katak nia sei habelar esgotu ba iha munisípiu Covalima, Lautém no Viqueque, tanba área sira-ne’e iha kbiit ba feto sira-ne’ebé hela iha tasi-ibun.
“Ami prepara mákina suku 100 atu fahe ba munisípiu. Ami distribui mákina sira tuir nesesidade ne’ebé mak iha,” nia dehan.
Ho asuntu ne’e, emprezária ne’e sujere ba feto sira katak sira bele rezolve difikuldade sira no sai aten-barani, tanba difikuldade sira-ne’e ajuda sira atu aumenta no sai maka’as liutan hodi hadi’a sira-nia kualidade moris nian.
“Ita bele lakon ita-nia moris maibé buat ne’ebé importante mak atu hamriik no kontinua la’o ba oin,” nia dehan.
Clarissa Lay hateten, maske feto sira kontribui iha setór privadu ba dezenvolvimentu nasaun nian, kontribuisaun Estadu nian mínimu. Tanba ne’e, Governu no parseiru dezenvolvimentu presiza investe iha kualifikasaun rekursu umanu no finanseiru. Emprezária ne’e hateten katak kompañia suku ne’e hetan ona apoiu husi Fundu Dezenvolvimentu Merkadu iha Austrália durante tinan ida.
“Ami investe mesak maibé ami kontinua presiza apoiu hosi Fundu Dezenvolvimentu Merkadu no Governu. Se bele, Ezekutivu bele fó fatin ba ami iha munisípiu sira atu tau mákina,” nia rekomenda.
Jornalista : Osória Marques
Editór : Cancio Ximenes
