DILI, 08 marsu 2023 (TATOLI) – Ministru Prezidénsia Konsellu Ministru, Fidélis Magalhães, informa Governu sei estabelese komisaun ba elaborasaun relatóriu finál hosi mandatu Governu Daualuk nian.
“Konsellu Ministru aprova ona projetu rezolusaun Governu nian, ne’ebé aprezenta husi Primeiru-Ministru, Taur Matan Ruak, hodi kria komisaun ba elaborasaun relatóriu finál hosi mandatu Governu Daualuk nian”, governante ne’e hatete iha Palásiu Governu, kuarta ne’e.
Komisaun ne’e iha misaun atu lidera preparasaun relatóriu finál ne’ebé sei dezenvolve ninia metodolojia no objetivu sira; hala’o konsulta hamutuk ho entidade relevante sira atu determina objetivu sira ne’ebé propoin ba relatóriu; aprezenta objetivu sira ne’ebé atu propoin ba Konsellu Ministrus ba aprovasaun ne’e; fasilita koleta dadus no realizasaun ba sorumutuk ho entidade relevante sira; asegura preparasaun relatóriu preliminár; no aprezenta projetu relatóriu nian ba Konsellu Ministrus.
Iha komisaun ne’e nia laran sei iha kompozisaun téknika ne’ebé sei lidera hosi Ajénsia Nasionál Planeamentu, Monitorizasaun no Avaliasaun no apoia hosi ekipa Prezidénsia Konsellu Ministru no ministériu sira seluk.
Jornalista : Antónia Gusmão
Editora: Maria Auxiliadora
