DILI, POLÍTIKA

GMPTL: papél feto iha dezenvolvimentu importante

GMPTL: papél feto iha dezenvolvimentu importante

Diskusaun jéneru meza redonda iha ámbitu komemorasaun loron mundiál ba feto, iha auditorium Kuartel Jenerál, F-FDTL, Fatuhada, Dili, kuarta (08/03/2023). Imajen Tatoli/Egas Cristóvão

DILI, 08 marsu 2023 (TATOLI)—Presidente Grupo Mulher Parlamentár Timor-Leste (GMPTL), Lídia Norberta, hateten papél feto iha dezenvolvimentu importante tebes, nune’e tempu ona feto prontu lidera.

Notísia Relevante: Loron mundiál feto, Komandu PNTL husu sidadaun hakribi asédiu seksuál hasoru feto

“Hanesan Prezidente Feto Parlamentár, ami hakarak hato’o ksolok loron internasionál feto ba maluk feto timoroan sira hotu no feto maluk sira hosi rai-li’ur agora serbisu iha ita-nia rai hodi bele apoiu mós ba ita-nia dezenvolvimentu. Ami hosi GMPTL nia mensajen ba feto maluk sira Timor mak ho tema nasionál tinan ida-ne’e temi feto prontu lidera. Ne’e signifika ita feto nia papél iha dezenvolvimentu importante tebes,” Prezidente GMPTL, Lídia Norberta, hateten ba jornalista sira iha PN, relasiona ho komemorasaun loron internsionál feto iha 08 marsu tinan ne’e ne’ebé mundu hotu komemora inklui Timor-Leste.

Tanba ne’e, ba feto maluk sira hotu serbisu fó nafatin dedikasaun, ho matenek, sakrifísiu ba nasaun ne’e hodi dezenvolve liután liuhosi inspirasaun eróina sira-ne’ebé saran ba indepedénsia hodi nune’e rai ne’e hetan prosperidade ne’ebé ema hotu hakarak.

Deputada ne’e dehan, haree ba tema nasionál ne’e hafoin tinan 20 Timor-Leste restaura nia indepedénsia, uluk ko’alia empodera feto no agora ko’alia feto prontu lidera, hodi transforma ba lideransa feto ne’ebé hanoin ba komemorasaun ne’e ho esperansa katak lejislatura no ezekutivu tuir mai kompromisu ba asuntu feto kontinua iha nafatin.

“Feto prontu lidera ida-ne’e esforsu presiza ita hotu nia tulun iha nivel PN feto kuota 40% ekivale ba deputadu 26 hosi deputadu 65. Ida-ne’e hetan reprezentasaun menus ne’e iha Governu no munisípiu, ida-ne’e sai preokupasaun ba oin haree feto nia kualidade labele haree tenke haree kuoata feto mak ba, maibé haree duni kualidade tanba daudaun iha Timor-Leste haree feto barak mak kualidade kontribui ba dezenvolvimentu. Aleinde mós partisipasaun foti desizaun feto sira iha nivel kraik hanesan xefe suku no xefe aldeia, ida-ne’e sei menus,” nia dehan.

Durante ne’e, parte GMPTL ne’ebé ho kooperasaun ho Governu no organizaun feto nasionál no internasionál hala’o atividade sira promove feto maibé ba oin atu kontinua nafatin ho apoiu parte hotu.

Enkuantu kada tinan mós hala’o atividade komemorasaun hanesan iha nivel munisípiu sira hanesan atividade feto rurál, loron nasionál feto, iha mós kampaña loron 16 ida-ne’e GMPTL no Governu sempre realiza, maibé tinan ne’e mandatu Governu no PN ikus no tinan hirak la halo iha nasionál, ho ida ne’e tinan ne’e hanoin halo de’it iha nivel nasionál.

“GMPTL hamutuk Sekretáriu Estadu Igualidade Inkluzaun no UN Women ami koopera serbisu barak ba komemorasaun ida-ne’e, inklui parte sira seluk,” nia gateten.

Iha parte seluk, nia hateten, tinan ne’e komemorasaun loron internasionál feto úniku tanba Timor-Leste hasoru eleisaun parlamentár 2023, ida-ne’e importante tebes ba feto atu partisipa, ko’alia kona-ba feto prontu lidera ne’e katak preparasaun óinsa ba eleisaun parlamentár hodi haree ba formasaun ne’ebé halo.

Jornalista : Nelson de Sousa

Editór      : Cancio Ximenes

iklan
iklan

Leave a Reply

iklan
error: Content is protected !!