DILI, POLÍTIKA

KHUNTO fó importánsia promove igualidade jenéru iha partidu laran

KHUNTO fó importánsia promove igualidade jenéru iha partidu laran

Konselleiru Másimu Partidu KHUNTO, José dos Santos Naimori Bucar. Imajen Tatoli/Egas Cristovão

DILI, 08 marsu 2023 (TATOLI)—Konselleiru Másimu Partidu Kmanek Haburas Unidade Nasionál Timoroan (KHUNTO), José dos Santos Naimori “Bukar”, hateten KHUNTO fó importánsia promove igualidade jenéru hodi tau aas feto ho mane nia direitu hanesan iha partidu laran.

Notísia Relevante: Loron Mundiál Feto Valoriza Feto Nia Kontribuisaun ba Mudansa Sustentável

“Ohin loron importante tebes espesialmente ba Prezidente Mulher no ekipa tomak no espesiál ba ita-nia Prezidente Partidu ho komemorasaun ne’e hatudu ba ema hotu katak ami hadomi duni loron feto nian, liu-liu ba partidu KHUNTO. Tan ne’e, eventu ida-ne’e importante tebes ita hotu partisipa polítika iha rai-laran, tuir partidu ida-idak hanesan partidu KHUNTO rasik promove atu proteje duni feto. Feto ne’e tenke sai modelu ida forte ba nasaun tanba ita hotu hatene kuandu feto forte nasaun fort,” Konsilleiru Másimu Partidu KHUNTO ne’e hateten iha nia intervensaun iha komemorasaun loron mundiál feto ne’ebé selebra hosi feto partidu KHUNTO ho tema ‘’Partisipasaun feto iha eleisaun parlamentár 2023, haree hosi perspektiva demokrásia inkluziva”, iha Manleuana, kuarta ne’e.

KHUNTO fó importánsia ba feto, nune’e ida-ne’e oinsá preparasaun ba feto sira bainhira partidu hetan fiar hosi povu ba ukun hodi bele kontribui ba dezenvolvimentu nasaun nian.

“Polítika ne’e la’ós de’it ba ema mane maibé ba feto mós. Feto tenke fuan boot hakarak rona lakohi atu ko’alia bainhira ema krítika maibé Kritika ne’e motivasaun, fanun no promove nia  ema hotu bele koñese lalais,” nia dehan.

Nune’e, Lidér Supremu enkoraza feto KHUNTO atu apriende barak no tenke brani hola desizaun, brani hodi kurize, brani defende buat lo’os, no hara’ik an pasiénsia hodi rona iha politika, feto ida ne’ebé forte bele nakloke ba feto maluk hotu, no labele  hanoin de’it mak haree oan no serbisu iha uma laran de’it, maibé hatudu katak feto mós bele.

Nia mós,  hateten iha luta libertasaun eróina barak brani ho determinasaun ba konkista indepedénsia, nune’e feto hatudu ona iha tempu luta no agora  fó liberdade ba ema hotu mane ho feto hanesan servi nasaun lori dezenvolvimentu ba povu.

Prezidente Feto Partidu KHUNTO, Odete Peloy, hateten eventu ne’e hodi komemora loron mundiál feto ne’ebé mundu tomak selebra inklui Timor-Leste, no ohin dahuluk partidu liuhosi organizasaun filiada partidu KHUNTO marka istória komemora loron mundiál feto ho tema “Partisipasaun feto hodi kontribui ba iha eleisaun parlamentár 2023 hodi haree hosi perpektiva demokrásia inkluzivu”.

“Tanba sa loron ne’e importante, tanba iha loron ida-ne’e feto hotu-hotu luta atu hasoru diskriminasaun hosi forma oioin hasoru feto iha mundu, inklui ita-nia nasaun. Partidu KHUNTO liuhosi organizasaun filiada hakarak selebra loron ida ne’e hamutuk ho feto hotu hodi halo reflesaun, tanba feto mós iha direitu hanesan ho mane iha nasaun demokrátiku Timor-Leste no mós kontribui ba prosesu dezenvolvimentu,” nia hateten.

Nia hatutuan, feto mós sai autór importante ba dezenvolvimentu ba família no nasaun, nasaun sei la’o ba oin ho di’ak tenke sura ho feto nia partisipasaun, se la’ós ita sé loos, se la’ós agora bainhira.

“Iha partidu KHUNTO ita lidera hosi feto, ne’ebé sai modelu hodi foti desizaun ba nasaun no kontribui dezenvolvimentu povu nia moris di’ak, lema partidu KHUNTO tane ó emar signifika ema hotu labarik, feto hotu iha direitu hanesan iha nasaun RDTL ida-ne’e. Tane ó lisan feto hotu tenke banati tuir lisan hanesan identidade Timor-Leste ho no tane ó rai, rai ida-ne’e mak fó bokur ba ita hotu hamutuk hodi kria pás no estabilidade liu-liu entre feto ho feto atu apoiu malu iha kestaun polítika no seluk tán,” nia dehan.

Jornalista : Nelson de Sousa

Editór      : Cancio Ximenes

iklan
iklan

Leave a Reply

iklan
error: Content is protected !!