Komisaun B hahú diskute proposta-lei Presendénsia no Protokolu Estadu
DILI, 08 marsu 2023 (TATOLI)—Komisaun B trata asuntu Negósiu Estranjeiru no Defeza ho Seguransa iha Parlamentu Nasionál sei halo apresiasaun inisiál ba proposta-lei númeru 47/V(5a)-Lei Presendénsia no Protokolu Estadu.
“Presendénsia no Protokolu Estadu lei ida ne’e importante tebes atu regula serimónia ofisiál Estadu nian, ne’ebé komisaun halo audiénsia públika ona ho parte kaza sivíl Prezidensiál Repúblika,” Prezidente Komisaun B, José Agostinho Sequeira ‘Somotxo’, hateten ba jornalista sira iha PN.
Tuir ajenda komisaun sei halo ona audiénsia mós ho Prezidénsia Konsellu Ministru (PCM, siglá portugés), Ministéiru Negósiu Estranjeiru no Kooperasaun (MNEK), Ministéiru Administrasaun Estatál (MAE), hodi rona sira-nia ba proposta-lei ne’e, hafoin komisaun sei halo relatóriu paresér hodi submete ba meza PN hodi ajenda diskusaun iha faze jeneralidade.
Deputadu Somotxo seida’uk esplika detallu proposta-lei ne’ebé iha artigu hamutuk 30-resin ne’e.
Antes ne’e, Konsellu Ministru (KM) aprova proposta-lei Presendénsia no Protokolu Estadu ne’ebé aprezenta hosi Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno.
Projetu proposta lei ida-ne’e ho objetivu atu define rejime jurídiku ida kona-ba organizasaun serimónia ofisial sira-ne’ebé regula relasionamentu Protokolu hosi entidade públika aas sira iha serimónia Estadu, no dixiplina funsionamentu Protokolu Estadu nian.
Jornalista : Nelson de Sousa
Editór : Cancio Ximenes
