DILI, 08 marsu 2023 (TATOLI) – Ministru Turizmu, Komérsiu no Indústria (MTKI), José Lucas da Silva, aprezenta opsaun polítika-lejizlativa ne’ebé sai hanesan baze ba inisiativa hodi kria retribuisaun atividade turístika ida.
“Opsaun sira ne’ebé aprezenta ninia objetivu mak atu estabelese lisensiamentu ba atividade turístika sira liuhusi pagamentu ba taxa ida no enkuadramentu legál atu halo kobransa husi taxa ba atividade turístika”, Ministru Prezidénsia Konsellu Ministru, Fidélis Magalhães, hatete iha Palásiu Governu, kuarta ne’e.
Nia hatutan, opsaun polítika-lejizlativa ne’e hakarak mós atu regulamenta atividade investimentu sira ne’ebé promove husi pesoa singulár ka koletiva, nasionál ka estranjeira, ne’ebé relasiona ho atividade turístika, no define direitu no obrigasaun setór públiku no privadu nian atu hala’o atividade turístika sira.
“Maibé ne’e foin aprezenta opsaun de’it, iha reuniaun Konsellu Ministru sira tuir mai sei diskute filafali dokumentu sira ne’e hodi halo aprovasaun”, konklui.
Jornalista: Antónia Gusmão
Editora: Maria Auxiliadora
