BAUCAU, 08 marsu 2023 (TATOLI) – Mota iha suku Samalari, postu administrativu Baucau vila fó ameasa ba komunidade tanba hetan estragu durante tempu udan.
Xefi suku Samalari, Rui Sertório Magno Siqueira, esplika, klima ne’ebé akontese iha kauza udan-boot iha área postu administrativu Ossu, munisípiu Viqueque, Venilale halo udan-boot no sobu mota ninin nune’e ameasa uma komunidade hosi suku refere.
“Ha’u halo ona proposta ba nasionál atu halo kedas normalizasaun, uma sira-ne’e bele mota sobu, tanba hela oituan de’it ona,” Xefe suku Samalari hateten iha Samalari, kuarta ne’e.
Uma-kain hamutuk 183 iha área Lauala’a mak hetan ameasa tanba distánsia entre mota ninin ba uma komunidade purvolta metru 20 ne’ebé konsideradu ameasadu uma bainhira tempu udan.
Autoridade suku hato’o ona proposta no Prezidente Institusaun Jestaun Ekipamentu, I.P, (IGE, sigla, portugés) direitamente to’o ona terenu hodi observa direita kondisaun mota iha área Laualia’a no tuir planu tempu besik sei halo normalizasaun ba mota refere.
“Sira sei halo dalan foun ba bee fatin kuaze kilómetru 3, hosi monumentu David Alex nia subar fatin to’o iha kanál irrigasaun Sobabere nian, nia luan ne’ebé atu ke’e metru-6,” Rui Siqueira akresenta.
Komunidade Canizio Nazario Peidade Fraga, hateten, situasaun ne’e kauza husi udan-boot ne’ebé akontese mak mota hosi Quelicai, Venilale no Ossu sobu tiha rai ne’e besik uma komunidade.
“Udan maka’as halo mota tuun boot, sobu rai ne’e to’o agora besik mai tiha uma, ne’e fó ona ameasa mai ami-nia uma,” Canizio Fraga hateten.
Canizio Fraga husu atu institusaun relevante liuhosi Ministériu Obra Públika (MOP) atu fó atensaun hanesan ekipamentu hodi normaliza mota nune’e futuru labele fó ameasa ba komunidade.
Suku Samalari iha aldeia haat komposta hosi Samalari, Sorulai, Festau no Ossoluga ho totál populasaun 3.187 hosi xefe família 681.
Jornalista : Natalino Belo
Editór : Evaristo Soares Martins
