DILI, 08 marsu 2023 (TATOLI)–Diretór Jerál Sekretariadu Tékniku Administrasaun Eleitorál (STAE), Acilino Manuel Branco, hateten STAE realiza enkontru ho partidu polítiku sira hodi fahe informasaun prosesu akreditasaun kredensiál ba partidu polítiku nia fiskál kona-ba votasaun iha eleisaun no apuramentu nasionál.
Notísia Relevante: Partidu 24 sei konkorre iha eleisaun parlamentár 2023
“Horisehik ha’u enkotru ho partidu polítiku sira no STAE munisípiu sira hodi hato’o informasaun liga ho preparasaun fiskál partidu polítiku sira-nian, mezmu prosesu kandidatura oras ne’e la’o hela entaun ita bolu partidu legalidade sira atu mai rona informasaun sira antes para sira sedu. Karik ikus mai sira mós konkere no prosesu inskrisaun iha tribunál mak liu karik, nune’e sira bele prepara sira-nia fiskál,” Diretór Jerál STAE ne’e hateten ba Agência Tatoli, liuhosi telefónika, kuarta ne’e.
Tanba, nia dehan, tuir kalendáriu katak iha fulan-marsu nia rohan mak Tribunál Rekursu (TR) anúnsia rezultadu partidu polítiku sira-ne’ebé admitidu ona entaun STAE hakarak fó informasaun sedu hodi sira bele prepara tuir tanba hein TR, nune’e partidu polítiku sira sei ba halo kampaña entaun laiha tempu atu tuir.
Nia hateten, kada partidu polítiku sei prepara nia fiskál 10.000-resin ba eleisaun parlamentár entaun hirak-ne’e hotu STAE prepara antes nune’e bele preparadu.
“Ho ida-ne’e, ami aprezenta mós kritériu sira oinsá mak atu relata sira-nia fiskál ba STAE. No rekezitu ne’ebé atu hatama mak sira tenke dirije sira-nia karta ba diretór jerál STAE, sira mós sei prienxe formatu ne’ebé STAE prepara ba sira. Iha ne’ebá, tuir nia, sira sei prienxe sira-nia fiskál tau iha munisípiu, postu no suku ne’ebé, nune’e mós iha fotografia 3X4 tahan rua (2) no sei hatama ba STAE, bainhira TR hahú anúnsia ona partidu polítiku ne’ebé admitidu hodi konkore iha Eleisaun Parlamentár,” nia dehan.
Maibé, nia hateten, atendementu sira-ne’e sei atende iha ida-idak nia munisípiu maibé pedidu mak tenke dirije mai iha nasionál.
Aleinde ne’e, hosi enkotru ne’e hotu STAE esplika estasaun no sentru votasaun sira atu monta iha suku, postu no munisípiu sira hotu.
Nia dehan, partidu polítika sei tau nia emar ka fiskál iha estasaun no sentru iha ema na’in-lima, apruramentu munisipál no nasionál iha tau ema na’in-rua.
“Hosi enkontru ne’e partidu polítika sira dehan ho informasaun sira sei tulun sira hodi bele hala’o tuir,” ni dehan.
Notísia Relevante: Kampaña eleitorál ba Eleisaun Parlamentár sei hahú iha 19 abríl
Jornalista : Osória Marques
Editór : Cancio Ximenes
