Tratór unidade 18 la sufisiénte fila-rai atu halai natar
COVALIMA, 08 marsu 2023 (TATOLI)–Xefe Brigada Sentru Tratór Munisípiu Covalima, Tomas Amarál, hateten tratór unidade 18 la sufisiénte atende fila agrikultór sira-nia rai atu halai natár ba époka tinan 2023 hodi hasa’e produsaun.
“Durante ne’e ami halo atendimentu ba agrikultór sira ho totál tratór iha Covalima hamutuk unidade 30. Hosi númeru tratór ne’e, unidade lima (5) halo ona lelaun, tratór unidade rua (2) kondisaun todan no tratór unidade lima (5) aat kmaan. Ne’ebé, presiza halo manutensaun lalais, nune’e tratór unidade 18 mak prontu atu fila-rai maibe la sufisiente,” Tomas Amarál hateten ba Agência Tatoli, iha resintu AMC, Sukaer Laran, kuarta ne’e.
Nia hateten, durante ne’e tratór unidade 30 mak halo atendimentu ba agrikultór sira atu fila sira-nia rai hodi kobre iha Covalima, tanba ho kondisaun tratór ne’ebé iha la sufisiénte atu atende agrikultór sira hotu.
Hosi númeru tratór 18 sentru tratór Sanfuk Covalima halo de’it atendimentu ba agrikultór sira iha postu administrativu sira hanesan Suai, Maucatar, Tilomar ho Zumalai ne’ebé koloka hotu ona postu tuir kondisaun tratór ne’ebé iha.
Maske iha fulan setembru tinan 2022 nw’w, komapañia halo duni manutensaun ba tratór unidade ualu (8) konsege hadia di’ak, nune’e tratór hamutuk unidade 18 no tratór balun kompañia la konsege halo manutensaun tanba ekipamentu la to’o.
Xefe sentru tratór iha Covalima mós husu ba Governu atu sosa tan tratór unidade 15 hodi halo atendimentu ba agrikultór sira-ne’ebé mak atu fila sira-nia rai, hodi hasa’e produsaun iha rai laran.
Munisípiu Covalima iha postu administrativu hitu mak hanesan Suai, Tilomar, Fohorem, Fatululik, Maucatar, Fatumea no Zumalai no nia suku 30 no aldeia 148.
Jornalista : Celestina Teles
Editór : Cancio Ximenes
