DILI, 09 2023 (TATOLI) – Diretór Ezekutivu Servisu Autónomu Medikamentu Ekipamentu Saude (SAMES) Santana Martins, dehan Lei aprovizionamentu difikulta SAMES atu sosa aimoruk iha 2023 nian.
“To’o agora lei aprovizionamentu, númeru 22/2022 difikulta ami seidauk sosa aimoruk ba tinan 2023 tanba labele utiliza lei ne’e ba prosesu aprovizionamentu liuliu ba kompra medikamentu nian”, Santana Martins, hateten ba TATOLI iha salaun MS, ohin.
Nia dehan, husi implementasaun dekretu lei númeru 22/2022 hatudu ba SAMES atu halo fila fali ezersísiu mezmu konsiente katak iha situasaun agora aimoruk estock out barak tanba iha mudansa estrutura lei ida ne’e.
“Ami ezije bebeik atu bele halo alterasaun ba lei ida ne’e no tenke espesífiku ba estatutu SAMES nian atu iha flesibilidade ba prosesu aprovizionamentu kualker tempu maibé ho sistema agora daudaun ami sente katak problema boot ba ami”, nia esplika.
Nia subliña, iha dekretu lei númeru 22/2022 11 maiu ne’ebé ko’alia kona-ba rejime jerál aprovizionamentu ho nia prosesu sira ho artigu 193 pontu D hateten rejime aprovizionamentu SAMES nian ne’ebé mak refere ba kompra medikamentu revogadu signifika katak husi 1 janeiru 2023 labele utiliza ona lei ne’e iha prosesu aprovizionamentu liuliu ba kompra medikamentu.
“Konsekuénsia husi mudansa ne’e sei afeta ba disponibilidade aimoruk sira iha fasilidade saúde tanba ita mós haree katak 2021-2022 mós ita problema estoke aimoruk mamuk. Entaun prosesu foun ne’ebé mak iha sei afeta barak liután ba estoke aimoruk sira”, nia informa.
Durante fulan rua nia-laran, SAMES halo ezersísiu makas no dezenvolve dokumentu sira aprovizionamentu nian, tantu servisu operasionál no mós espesífiku inklui kompra medikamentu, entaun tenke ajusta tuir rejime foun tanba ne’e mak afeta ba SAMES atrazu prosesa aprovizionamentu iha 2023.
Iha sorin seluk, Minsitra Saúde Odete Maria Freitas Belo, dehan MS diskute ona lei aprovizionamentu SAMES nian ne’ebé iha mudansa maibé iha dalan atu kompra aimoruk sira.
“Ami diskute ona lei aprovisonamentu foun husi SAMES nian ne’ebé mak daudaun ne’e iha mudansa no ita iha dalan atu sosa aimoruk sira, entaun ami koko atu halo no rejista lei ne’ebé mak agora iha, ha’u husu diretór sira atu hakerek hela problema saida mak iha ne’eba atu ita hato’o ba Konsellu Ministru hodi rezolve ida ne’e”, nia konklui.
Jornalista : Felicidade Ximenes
Editór : Zezito Silva
