MAE kapasita autoridade suku iha Baucau hodi utiliza sistema dijital
BAUCAU, 09 marsu 2023 (TATOLI)– Ministériu Admistrasaun Estatal (MAE) hala’o kapasitasaun ba autoridade lókal hanesan Xefe suku no Pesoál Apoia Suku (PAS) iha munisipiu Baucau ahodi utuliza sistema dijital hanaran sixsa.
Diretór Informasaun Teknolojia Ministériu Admistrasaun Estatal (MAE), Benedito Corea Fernandes, hateten formasaun ne’e atu fasilita autoridade lokal sira atu halo atendimentu serbisu ba komunidade sira ho sistema dijital liuliu prense dadus sira via online, atu halo mudansa hosi sistema manual.
“Durante ne’e sira prense livru manual 18, daudaun sira aprende fali prense elektronika liuhosi sistema ida naran sixsa ne’e,” Diretór Informasaun Teknolojia Ministériu Admistrasaun Estatal (MAE) hateten iha Vila nova, kinta ne’e.
Formasaun refere durante loron haat hahú tersa no sei termina iha sesta, 6 to’o 10 marsu ne’ebé fahé ba grupu rua kompostu postu Baucau vila, Vemase no Venilale realiza iha postu Baucau vila.
Enkuantu grupu seluk kompostu postu Laga, Quelicai no Baguia realiza iha postu Laga ne’ebé partisipantes hosi xefi suku no PAS hosi kada postu iha munisípiu Baucau.
Hosi postu neen iha munisípiu Baucau hamutuk suku 56 ne’ebé Xefe suku no PAS sira aprende materia hanesan prense livru populasaun liuhosi komputadór ne’ebé Ministériu distribui no instala ona sistema sixsa ne’ebé dezenvolve bazeia ba livru serbisu iha suku.
“Balun komprende diak tebes no balun presija aprende masimu liutan, ita fiar sira sei intende tanba antes ne’e sira aprende ona manúal,” Benedito Fernandes.
Esperansa hosi formasaun refere futuru bele fasilita autoridade suku sira hafasil serbisu atendimentu diak liutan no bele asegura dadus liuhosi sistema dijital.
Jornalista : Natalino Belo
Editór : Florencio Miranda Ximenes
