Maria Angelina reprezenta PN TL partisipa fórum Parlamentár kona-ba LDC
DILI, 09 marsu 2023 (TATOLI)—Vise Prezidente Parlamentu Nasionál, Maria Angelina Sarmento, reprezenta segundu órgaun soberania partisipa fórum Parlamentár dalimak konferénsia Organizasaun Nasaun Unida (ONU) kona-ba Nasaun Menus Dezenvolvidu (Least Developed Countries, LDC) iha Doha, Qatar hosi loron 4-9 marsu tinan ne’e.
Tuir komunikadu ne’ebé Agência Tatoli asesu, kinta ne’e, haktuir konferénsia Nasaun Unida dalima kona-ba LDC, ne’ebé hala’o iha Doha, Qatar, hetan mós partisipasaun hosi Parlamentu Nasionál ne’ebé reprezenta hosi Primeira Vise Prezidente Parlamentu Nasionál, Deputada Maria Angelina Lopes Sarmento, no delegasaun Timor-Leste Xefia hosi Prezidente Repúblika, José Ramos Horta, akompañadu Ministra Negósiu Estranjeiru no Kooperasaun (MNEK), Ministru Finansa no sosiedade sivíl.
Iha loron 04 fulan-marsu, programa hahú ho abertura ofisiál iha fórum Parlamentár, ho prezensa Deputadu sira hamutuk 46 hosi nasaun menus dezenvolvidu no marka mós prezensa hosi parte sira seluk.
Iha sesaun meza redonda subordinada ba tema nasaun menus dezenvolvidu iha perspetiva dezáfiu atu rezolve, oportunidade atu esplora no reprezentasaun feto no joven iha Parlamentu iha situasaun atuál no sesaun seluk mós governasaun, dezáfiu ba reforma institusionál.
Iha Vise Prezidente PN, Maria Angelina Lopes Sarmento, nia intervensaun ne’e hateten nia partisipa iha eventu ida-ne’e reprezenta segundu órgaun soberania Timor-Leste, hanesan PN, priviléjiu ida ba TL bele mai fahe ideia, lisaun balun, hanesan membru grupu nasaun menus dezenvolvidu 46.
“Nasaun menus dezenvolvidu dala barak enfrenta dezáfiu lubun ida iha governasaun, tantu internamente no relasaun ho instituisaun internasionál sira. Dezáfiu balun inklui korrupsaun, frajilidade instituisionál no instabilidade polítika ne’ebé bele estraga esforsu ba hadi’a governasaun, bele mós prezudika kapasidade LDC atu enfrenta dezáfiu dezenvolvimentu sira,” nia hateten liuhosi nota imprensa.
Relasiona ho Parlamentu LDC, óinsa esforsu atu bele reprezenta iha grupu feto no joven no mós grupu sira seluk, iha fatin seluk atu fortalese nia pápel atu halo supervizaun.
Nia dehan, esperiensia Timor-Leste atu sai Parlamentu mais reprezentativu, medida ida mak estabelese kuota, rezerva númeru vaga ne’ebé loos ba feto no joven entre grupu sub-reprezentadu mak atualmente, Timor-Leste atinje ona taxa 40% feto iha Parlamentu no 18% jovens iha lejislatura dalimak.
Partidu polítiku sira tenke dezempeña papél fundamental iha promosaun ba partisipasaun grupu sira, adota asaun polítika atu insentiva indikasaun kandidatu sira.
Aliénde pápel partidu polítiku sira, edukasaun eleitór sira-nian no asesu ba rekursu no finansiamentu ba feto, joven ba kapasitasaun ho objetivu atu konkorre ba kargu públiku, bele ajuda aumenta sira-nia reprezentativa.
Deputada Maria Angelina destaka iha intervensaun fortalese komité Parlamentár no ninia papél supervizaun ne’ebé foka ba asuntu espesífiku sira hanesan direitu feto nian, dezenvolvimentu juventude no mós direitu umanu.
Entrenatu, iha sesaun husu no hatán interviente fórum hosi Mali, Burkina Faso, Guiné Ekuatoriál, Angola, illa Salomão nian no seluk tan aprezenta sira-nia observasaun, kestaun oinsá garante dezenvolvimentu sustentavél enkuantu laiha pás, no nasaun barak mak sei frájil no vulneravél tanba konflitu armadu, krize umanitária no krize seguransa ne’ebé la garante Estadu ida saudavél.
Laiha kondisaun ba dezenvolvimentu sustentavél laiha iha pás, nasaun sira-ne’ebé hetan kolonializasaun frajil no vulneravél liu iha sirkunstánsia ida-ne’e.
Iha sesaun pergunta koloka mós kestaun kona-ba partisipasaun feto no joven ne’ebé garantia hosi lei no konstituisaun, oinsá Parlamentu sira buka forma efikás atu bele kombate korrupsaun, kapasitasaun Deputadu sira hosi nasaun menu dezenvolvidu, Orsamentu Jerál Estadu (OJE) inklui lei atu iha kapasidade halo fiskalizasaun ba exekusaun ba OJE.
Jornalista : Nelson de Sousa
Editór : Cancio Ximenes
