DILI, 09 marsu 2023 (TATOLI) – Ministériu Saúde (MS) liuhosi ekipa vijilánsia sanitária fó edukasaun saúde ai-han seguru ba vendedór no negosiante ne’ebe tein no faan hahan iha dalan públiku sira iha Munisípiu Dili.
“Atividade edukasaun ida ne’e ho objetivu atu hasae koñesimentu vendedór sira atu bele prepara ai-han sira ho maneira ne’ebé mak seguru atu ema hirak ne’ebé mak konsumu karik, bele iha saúde di’ak, la kauza ba moras sira”, Diretór Nasionál Saúde Publika Frederico Bosco, informa iha Cámara Eklesiátika Lecidere, ohin.
Nia afirma, hanesan responsabilidade ba parte saúde publika mak atu asegura komunidade sira ne’ebé konsumu atu labele hetan risku ruma, entaun presiza hasa’e koñesimentu liuhosi asaun intervensaun edukasaun saúde ne’ebé mak fó ba sira.
“Ohin ita-nia ekipa vijilánsia sanitária sira halo atividade edukasaun ba ita-nia komunidade liuliu ba ita-nia negosiante, vendedór sira ne’ebé mak faan hahan ba públiku atu konsumu hanesan ita boot sira hatene katak atividade negósiu ne’ebé ita-nia komunidade sira halo atu bele sustenta sira moris maibé presiza faan ai-han ne’ebé seguru”, nia esplika.
Tanba ne’e, MS nafatin tenta halo intervensaun no halo edukasaun ba vendedór sira hodi hasae sira nia koñesimentu atu bele faan hahan seguru ba públiku .
“Se ita la konsegue halo edukasaun ba sira, automatikamente sira la iha koñesimentu kona-ba maneira atu prepara hahan no prezerva hahan aumezmu tempu bainhira ita faan mós dalaruma sira la faan ho kritériu ne’ebé mak saudável, ezemplu; sira la taka hahan, husik hahan loke rai rahun bele tama, depois lalar bele tur ba no bele fó moras ba ema ne’ebé sosa”, nia subliña.
Iha sorin seluk, Responsável Programa Saúde Ambientál iha MS, Natalino Aleixo, dehan objetivu husi atividade ida ne’e mak halo kontrolu ba vendedór sira ne’ebé mak faan hahan iha dalan ninin no restaurante sira atu fó edukasaun ba sira atu prátika ai-han seguru ba públiku sira.
“Ami halo atividade ida ne’e ba vendedór sira ne’ebé mak faan hahan iha dalan ninin no restaurante sira atu ita fó edukasaun ba ita sira atu bele prepara ai-han ne’ebé mak seguru hodi minimiza riksu moras ne’ebé kauza husi ai-han, ezemplu hanesan moras diarea sira”, Natalino Aleixo relata.
Nia akresenta, fatin ne’ebé mak alvu ba MS atu fó edukasaun saúde ba vendedór sira mak husi terminál becora tama to’o tasi tolu.
Vendedora Marcelina Pinto husi aldeia Mota Ulun, Suku Becora, Postu Adminsitrativu Cristo Rei agradese ba ekipa MS ne’ebé tun direta ba terenu hodi haree rasik hahan ne’ebé mak faan iha dalan sira.
“Ha’u agradese ba MS ne’ebé mak ohin mai haree ami nia hahan ne’ebé mak faan iha estrada hodi haree moos ka lae, sira fó hanoin ba ami atu prepara ai-han tenke moos no seguru atu públiku sira konsumu hodi labele hetan moras sira”, nia konklui.
Jornalista : Felicidade Ximenes
Editór : Zezito Silva