iklan

HEADLINE, SAÚDE

MS halo advokasia ba lider relijiozu sira kona-ba imunizasaun rutina iha TL

MS halo advokasia ba lider relijiozu sira kona-ba imunizasaun rutina iha TL

Vise-Ministru Saúde, Bonifácio Maucoli dos Reis. Imajen Tatoli/Francisco Sony

DILI, 09 marsu 2023 (TATOLI) – Ministériu Saúde halo advokasia  ba  lider  relijiozu sira kona-ba imunizasaun rutina ba labarik sira iha Timor-Leste.

“Ohin loron, ita habelar informasaun kona-ba Kampaña Nasionál Integradu ba Vasina, atu  bele iha kompromisu komún ida hodi halo advokasia nasionál, hasa’e kobertura ba programa imunizasaun rutina, integradu ba programa vasina covid-19, doze dahuluk, daruak no booster, vasina PCV, sarampu rubella, Polio no distribuisaun ai-moruk Lombriga, Albendazole hamutuk ho Igreja no sarani tomak, parseiru no entidade hotu hodi luta kontra moras hada’et no la hada’et sira”, Vise Ministru Saúde Bonifacio Maucoli dos Reis, informa bainhira halo diskursu iha Cámara Eklessiátika Lecidere, ohin.

Nia afirma, dadus husi vijilánsia epidemiolójika loron 6 fulan marsu 2023 ba progresu ba vasina kontra covid-19 iha Timor- Leste, hatudu populasaun ho idade tinan 18 ne’ebé hetan ona vasinasaun kontra covid-19 ba primeira doze maka 89.0% no segunda doze maka 79.6% no doze booster maka 35.9%.

Programa vasina kontra covid-19 espanda mós ba labarik ho idade tinan 12 to’o menus 18 ho vasina Pfizer iha eskola no labarik primeira doze atinje 96.5% no segunda doze atinje 82.7%. Tanba ne’e, Ministériu Saúde kontinua ho atividade sira ne’e hodi buka forma estratéjiku foun atu bele hala’o vasina ba covid-19, nune’e ita bele livre husi covid-19.

“Kobertura ba atividade imunizasaun suplementár ne’ebé maka lansa iha 2023, dadus husi sistema informasaun saúde 8 marsu 2023, tuir munisípiu hatudu katak maizmenus munisípiu ualu to’o sia mak ultrapassa ona kobertura 100%”, nia subliña.

Nia esplika, Munisípiu Bobonaro maka iha kobertura aas liu hotu ba vasina polio orál, vasina konjugadu pneumonokokus, sarampu-rubella, kobertura vitamina A no desparazitasaun ho albendazole no kobertura ki’ik liu hotu maka Munisípiu Dili seidauk atinje liu 100% iha kampaña atividade imunizasaun suplementár balun, tuir fali Munisípiu Liquiça.

“Dili nu’udar sidade kapitál, reprezenta munisípiu hotu presiza ita hotu nia kontribuisaun hodi hasa’e kobertura. Presiza identifika fatór determinante ka obstákulu ba kobertura sei ki’ik. ninia rezultadu fó impaktu maka’as ba kobertura média nível nasionál mak OPV 101.3%, PCV 101.0%, MR 97.7%, vitamina A 97.9% no desparazitasaun albendazole 98.0%. Munisípiu sira seluk ne’ebé ultrapassa ona 100% presiza atu mantein nafatin nia kobertura”, nia relata.

Nia informa, ho vasina, Timor-Leste bele prevene hasoru moras todan sira hanesan TBC, Polio, Sarampo, Rubella Pneumonia, Hepatitis, Difteria, Tetanus, Pertussis, no redús hospitalizasaun no mate, nune’e mós ba vasina covid-19, doze dahuluk, daruak no booster bele prevene husi risku variante covid-19.

Iha fatin hanesan, Vigariu Paroquia Imakulada Katedral Dili, João Soares, dehan kooperasaun entre Ministériu Saúde no mós uma kreda ne’e parte pozitivu bo’ot ida hodi tulun sarani povu liuliu labarik kiik sira.

“Ami la’os foin mak koopera maibé tinan barak ami sempre simu informasaun ruma husi saúde, entaun ho sosializasaun ida ne’e tulun tebes atu ajuda sarani sira atu ba simu vasina hodi prevene moras hotu tanba bainhira saúde di’ak mak atividade relijioza mós la’o di’ak”, nia konklui.

Jornalista : Felicidade Ximenes

Editór : Zezito Silva

iklan
iklan

Leave a Reply

iklan
error: Content is protected !!