Ofisiál STAE halo atendimentu iha postu administrativu ladún efisiénsia
COVALIMA, 09 marsu 2023 (TATOLI)–Ofisiál Sekretáriu Tékniku Administrasaun Eleitorál (STAE) Covalima halo atendimentu sidadaun-sira atu hasai sira-nia kartaun eleitorál iha postu administrativu sira, ladún efisiénsia tanba iha fulan fevereiru iklima udan no impaktu hosi ahi mate.
“Ofisiál STAE ne’ebé destaka ba postu administrativu-sira hala’o sira-nia kna’ar atu halo atendimentu sidadaun sira ladún efisiénsia tanba haree ba iklima udan no anin ahi mate, entaun operadór sira ladun ezerse sira-nia funsaun ho di’ak,” Francisco Gusmão hateten ba Agência Tatoli, iha nia servisu fatin, Kampung Baru, kinta ne’e.
Maske iha fulan-fevereiru ofisiál STAE hala’o funsaun ladún di’ak, maibé agora sira hahú halo ona atendimentu nune’e seidauk halo ajustamentu dadus munisípiu ni’an, sidadaun-sira ne’ebé hasai kartaun eleitorál.
“Ami-nia rezultadu provizóriu seidauk halo ajustamentu tanba kada postu administrativu kada loron atende de’it ema na’in-ida dala ruma mós ema laiha,” nia dehan.
Durante operadór STAE destakada iha postu administrativu sira-ne’e sidadaun sira ladún tau prioridade atu trata sira-nia kartaun eleitorál, tanba kada loron operadór STAE atende na’in-ida de’it dala ruma mós laiha.
STAE esforsu hodi hakbesik an ba postu administrativu sira, nune’e sidadaun sira bele trata sira-nia kartaun eleitorál nune’e sidadaun sira labele gasta osan ba transporte hosi postu administrativu mai iha munisípiu.
Realidade hatudu bainhira operadór STAE sira destaka ba iha postu administraivu, maibé sidadaun sira ladún tau importánsia atu trata sira-nia kartaun eleitorál.
“Ita labele lori sistema to’o ba sidadaun sira-nia uma enkuantu ema ho defisiénsia bainhira la la’o di’ak bainhira STAE simu pedidu hosi xefe aldeia sira operadór bele lori sistma ba uma hosi atende sidadaun ne’e,” nia hateten.
Ofisiál sira-ne’ebé hala’o servisu iha eskritóriu Administrasaun postu administrativu atu halo resensiamentu eleitorál inklui atualiza dadus eleitór, hodi hafasil komunidade hakbesik prosesu administrasaun ba baze.
Kritéria inportante ba eleitór, sira atu kompleta mak presiza dokumentu hanesan Billete Identidade (BI), Sertadaun RDTL no Passaporte, bazea ba lei númeru 19/2021, artigu 23.
Jornalista : Celestina Teles
Editór : Cancio Ximenes
