PNTL Viqueque sei asegura kampaña ElPar ho susesu
DILI, 09 marsu 2023 (TATOLI) – Komandante Polísia Nasionál Timor-Leste (PNTL) Munisípiu Viqueque Superintendente Polísia Sebastião Alves Quintão, garante sei asegura Kampaña Eleisaun Parlamentár (ElPar) la’o ho susesu no trankuilu.
“Ami hetan ona orientasaun klaru hosi Komandante Jerál PNTL Komisáriu na’in-rua ho komandante operasaun nasionál, bainhira hetan ona orientasaun, fila ba Viqueque ami tenke prepara planu rasik, prepara elementu sira hodi fó seguransa másima ba atividade hotu ne’ebé sei la’o iha Viqueque, liuliu konsolidasaun no kampaña partidu polítiku sira to’o ba eleisaun jerál”, Sebastião Alves Quintão dehan ba Agência TATOLI iha Farol, ohin.
Nia dehan, planu Komandu Munisípiu Viqueque mak koordena ho Xefe Sesaun Operasaun atu koloka membru sira tun ba halo seguransa iha fatin ne’ebé identifikadu tuir oráriu Komsaun Nasionál Eleisaun (CNE-sigla portugés) ne’ebé partidu polítiku sira atu hala’o atividade.
“Ita sei koloka membru sira ba área sira ne’ebé ita-nia lider sira atu ba halo atividade partidu nian, ita sei koloka membru sira ba fatin sira ne’ebé ita identifika risku ba asaltu, ameasa hosi ema ida ba ema seluk, halo intimidasaun, fatin sira ne’e mak ita sei koloka membru sira ba halo seguransa”, nia dehan.
Nia hatutan, Komandu Viqueque hakarak festa demokrasia ne’e fó liberdade ba ema hotu atu goja direitu ne’ebé konsagra ona iha Konstituisaun Repúblika Demokratika Timor-Leste (RDTL).
“Agora daudaun konsolidasaun iha munisípiu ne’ebé ha’u lidera la’o di’ak tebes, laiha konflitu ruma tanba ita-nia lider sira hanesan veteranu, lider igreja, lider organizasaun hotu servisu hamutuk di’ak tebes hodi garante estabilidade iha Viqueque, Viqueque la’o di’ak tebes tanba lider hotu mai ho sira nia abilidade ne’ebé hakarak atu muda naran Viqueque ida muturabu ne’e ba fali muturau”, komandante revela.
Komandante Sebastião haklaken totál membru iha Viqueque hamutuk 144 maibé na’in haat moras hela no seluk sei bele fó seguransa másima ba Munisípiu Viqueque iha períodu kampaña eleitorál no eleisaun jeraál ne’ebé sei akontese iha 21 maiu mai ne’e.
“Ho númeru ne’ebé iha, ami jere di’ak tebes, maibé ami la servisu mesak tanba ami sempre koopera hamutuk ho Batallaun Orden Públiku (BOP) Munisípiu Baucau no Falintil-Forsa Defeza Timor-Leste (F-FDTL) atu apoia ami iha Viqueque, ida ne’e mak ami nia rekursu ne’ebé tulun malu atu asegura páz iha munisípiu”, nia haktuir.
Nia afirma, membru PNTL ne’ebé atu asegura festa demokrasia sufisiente no sei halo servisu másimu no pronto halo atuasaun oras 24 iha situasaun saida de’it.
Enkuantu fasilidade ba PNTL Munisípiu Viqueque hanesan transporte no seluk tan sufisiente tanba Komandu Jerál koloka ona kareta hamutuk hitu ba eskuadra hotu iha Postu-Administrativu sira iha Viqueque laran atu apoia ba servisu.
“Ho fasilidade sira ne’e, ami sufisiente ona, bainhira tama ba eleisaun mak kareta la to’o, ha’u hanoin Komandu Jerál sei la taka matan no sei apoiu tan kareta ruma ba ami”, nia adianta.
“Reuniaun ami ho Komandu Jerál atu rona preokupasaun ne’ebé ami iha, ne’ebé ami relata ona kona-ba problema radiu komunikasaun, telefone, kareta no seluk tan, entaun iha tempu besik tékniku sira sei haree ba kestaun sira ne’e hodi rezolve”, nia revela.
Nia husu ba komunidade Viqueque hotu, atu kria nafatin paz no estabilidade tanba la’os de’it PNTL, lideransa partidu, lider autoridade lokál no organizasaun hotu maibé ema hotu nia hamutuk mak kria espiritu unidade iha Viqueque.
Jornalista: Hortencio Sanchez
Editór : Zezito Silva
