SEII espera partisipasaun feto iha eleisaun xefe suku bele atinje 10%
DILI, 09 marsu 2023 (TATOLI)—Diretór Jerál Sekretária Estadu Igualdade Inkluzaun (SEII), Armando da Costa, hateten SEII nia esperansa iha eleisaun ba xefe suku ba tinan ida-ne’e partisipasaun feto bele aumenta tan to’o 10% tanba eleisaun suku iha períodu liubá ne’e menus liu.
“Ami espera katak tinan ida-ne’e partisipasaun feto iha eleisaun xefe suku bele aumenta tan no labele hamenus. Tanba, ami-nia objetivu mak atu atinje 10% maibé se tinan ida-ne’e mak ne’e di’ak liután,” Diretór Jerál SEII ne’e hateten ba Agência Tatoli, iha edifísu SEII, Matadouro, kinta ne’e.
Atu garante ida-ne’e, nia dehan, Governu no parseiru sira sei kontinua haka’as-an atu apoia kandidatu feto sira iha eleisaun hotu-hotu no mós atu aumenta lideransa feto sira hosi nível nasionál ba suku.
Governu rasik forma ona ekipa ida bolu feto ne’ebé lidera hosi SEII hamutuk ho MOFE, Caucus, Pátria, Rede Feto no sira seluk atu servisu hamutuk ho Asosiasaun feto sira-nian iha munisípiu ida-idak atu identifika feto sira-ne’ebé iha poténsia atu hola parte iha eleisaun suku.
“Ekipa ida-ne’e atu identifika feto potensiál sira no ami servisu hamutuk hodi prepara sira-nia kandidatura. Iha tinan ida-ne’e,” nia hateten.
SEII hamutuk ho parseiru internasionál no nasionál sira hala’o atividade oioin hanesan bazar ba grupu feto sira iha Casa Europa dezde loron 3 fulan-marsu, merkadu kalan iha Timor Plaza, doasaun raan no vizita ospitál sira atu fó parabéns ba feto sira-ne’ebé tuur-ahi iha loron 8 fulan-marsu tinan 2023.
Aleinde ne’e, iha loron 10 fulan-marsu, sei lansa mós fatin merkadu seguru iha munisípiu Bobonaro ho Asosiasaun feto iha Bobonaro hodi fornese servisu merkadu ne’ebé seguru no inkluzivu.
Armando da Costa hateten, kona-ba partisipasaun feto sira-nian atu lidera xefe-suku sira iha tinan 2009-2016 pilotu sira só 2% de’it tanba feto iha (11%) (feto 11) no iha 2016-2023 sa’e ba 5% (21%) iha-neebe númeru ida-ne’e sai hanesan razaun ba SEII no parseiru sira atu aumenta ida-ne’e iha tinan 2023-2030.
Sekretáriu Tékniku Administrasaun Eleitorál (STAE) iha orsamentu Estadu tinan 2023, ne’ebé prevee mós millaun $9 ba eleisaun suku tinan 2023.
Jornalista : Osória Marques
Editór : Cancio Ximenes
